Mai Ja Yang Hpai Da Dabang de Miwa bai Du
February 20, 2005

The Kachin Post

Laiwa sai January shata htum hta pat jahkring da ai Mai Ja Yang mare na Hpai Da Dabang ni de Miwa ni bai du shang wa ma ai lam, mare salang langai tsun dan ai.

Miwa atsuya a tinang mungdan grupyin mungdan hkan hpaw da ai Hpai Da Dabang ni hpe shamyit ai masing a majaw Mai Ja Yang na Hpai Da Dabang ni jahkring kau ra ai rai n’na, Mai Ja Yang kaw bungli galaw tam sha nga ai Miwa mung masha law malawng wa mat ai rai nga ai.

Mare salang wa tsun ai hku rai yang, Mai Ja Yang kaw masha 3,000 daram sha nga mat sai lam hte Hpai Da Dabang hpaw nga ai ten hta gaw masha 20,000 daram nga ai lam chye lu ai. “[Mai Ja Yang gaw] hkraw hkraw rai mat sai,” ngu mare salang wa tsun wa ai.

Mai Ja Yang mare gaw Wunpawng Mungdan Shanglawt Hpung, KIO, uphkang ai n-pu na mare langai rai n’na, KIO magam gun ni hte jauman mare masha ni shanu nga ai rai nga ai. Hpai Da Dabang ni hpaw wa ai aten kaw na Miwa mung masha ni Mai Ja Yang de sut masa a majaw shanu nga wa ai rai nga ai.

February shata htum ai hte Hpai Da Dabang ni bai hpaw na matu Hpai Da sut du ni hku n’na hkyen lanjang nga ai lam mung chye lu ai.

January shata praw hta Myen hte Laos mung dan jarit mayan hkan hpaw da ai Hpai Da Dabang 68 hpe Miwa atsuya hku n’na pat shingdang kau sai rai nga ai.