NC lung na N mai Byin; SSA-North Tsun
February 14, 2005

The Kachin Post

Sam gap hkat jahkring hpung Shan State Army-North, SSA-North, gaw Sam mung masa ningbaw ni hpe rim da ai kaw na n dat yang, National Convention de shang lawm na n mai byin ai lam, BBC Myen shiga dap de tsun wa ai

SSA-North a ningtau Tingnyang Up Col Sao Gaifa gaw shan hte a Shan State Peace Council, SSPC, ningbaw Gen Hso Ten hpe n dat yang NC n lung na lam hte, rim da hkrum ai Sam ningbaw ni hpe lawan ladan dat ya na matu shadut dat sai. SSA-North na NC dat kasa ni mung Yangon mare kawn Sam mung de bai wa mat sai lam chye lu ai.

“Hso Ten hpe n dat ai rai yang gaw, NC jahkring da ra na re,” ngu Sao Kai Fa tsun wa ai. “N byin gying ai lam ni mung byin wa na re.” Hpa majaw nga yang, rim da hkrum ai Gen Hso Ten gaw amyu sha simsa lam lu na matu lit la galaw nga ai ningbaw langai re lam, Sao Kai Fa matut tsun wa ai.

SSPC ningbaw Gen Hso Ten hte malawm 4 gaw laiwa sai Feb 9 ya hta Sam mung Taunggyi mare hta rim hkrum ai rai n’na, ya ten du hkra n dat shi ai lam chye lu ai. Dai hte maren, Yangon mare nga Shan Nationalities League for Democracy, SNLD, Tingnyang Up Hkun Htun Oo hte Ninggawn Amu Madu Sai Nyunt Lwin ni hpe mung dai shani hta sha Myen hpyen du ni rim mat wa ai lam chye lu ai.

SSA-North gaw Shan State National Army, SSNA, hte rau 1996 ning hta Shan State Peace Council hpe hpaw hpang wa ai rai nga ai. De hpang, SSA-North hte SSNA ni gaw SNLD hte jawm n’na Shan State Joint Action Committee hpe matut hpaw hpang wa ai rai nga ai. SNLD gaw 1990 ning Myen mung ra latat poi hta Sam mung kaw Rapdaw shara law htum lu ai amyusha pati langai rai nga ai. SSA-North hte SSNA ni gaw Myen hpyen atsuya hte gap hkat jahkring lam la da ai hpung ni rai nga ai.

Sam ningbaw ni rim hkrum ai hte seng n’na American atsuya mung aja awa jahpoi ninghkap dat sai rai nga ai. Myen hpyen du ni n’dai zawn galaw ai lam gaw jet ai amyu sha kahkyin gumdin lam hpe ninghkap dat ai re ai hte, Myen mung masha ni hte mungkan ting a ra sharawng nga ai lam ni hpe n gawn n sawn di dat ai re ngu n’na, American atsuya tsun shaga ahkang Du Richard Boucher tsun wa sai.

Matut n’na, Myen mung na ra lata hkrum mung masa pati ni hte hpaw da ai Committee Representing People’s Parliament, CRPP, hku na mung amyusha hpung ni hpe National Convention de shang lawm na hte seng n’na bai myit yu na matu shadut wa sai.

Raitim, Wunpawng Mungdan Shanglawt Hpung, KIO, hku n’na gaw NC hpe matut lung na lam tsun wa ai.