Miwa hte Jinghpaw Mung Lapran Mawdaw Lam Kaba 2 Gawlaw Nga
February 12, 2005

The Kachin Post

Miwa Gumsan mung Yunnan mungdaw hte Jinghpaw mung lapran madang tsaw ai mawdaw lam kaba 2 hpe 2006 ning hpang jahtum taw let ngut hkra gaw gap na lam, Xinhua shiga hku chye lu ai.

Yunnan mungdaw Hpaga Yumga Dap tsun ai hku rai yang, Myitkyina hte Tengchong lapran na lam hpe Miwa gunhpraw wan 180 ma hkam let, Man Maw hte Zhangfeng lapran na lam hpe gaw wan 28 ma hkam n’na galaw nga ai lam chye lu ai.

N’dai mawdaw lam 2 hpe 2004 ning kawn galaw hpang wa ai hta, Myitkyina-Tengchong lam gaw 2005 ning htum hta ngut na rai n’na, Man Maw- Zhangfeng lam gaw 2006 ning hta ngut na re lam chye lu ai.

Lam kaba 2 hpe lawan ladan ngut hkra galaw nga ai gaw, Asia dingda ginwang hta Hpaga Yumga htinglu htinglai masan sa wa lu na matu re lam, Miwa atsuya magam gun ni tsun wa ai.