Ramman ni hpe NC hte Seng n’na KIO Sang Lang Dan February 9, 2005
Malihkrang Uma
February 17 ya hta Myen hpyen du ni bai woi hpang wa na National Convention de sa du shanglawm na hte seng n’na Wunpawng Mungdan Shanglawt Hpung, KIO, gaw Myitkyina mare na ramma ni hpe sang lang dan sai rai nga ai.
Myitkyina mare na Dakkasu jawngma ni hte Hkristan Hpung shagu na ramma ningbaw ni marai 19 tup gaw KIO Tingnyang Up malai II Dr. Tu Ja hte February 7 ya shana de hking 6 hta KIO Myitkyina dat kasa rung hta hkrum shaga ma ai rai nga ai.
“N’dai NC amu gaw anhte ni kyin taw nga ai amu law law hta na ahkyak dik langai re,” ngu n’na Dr. Tu Ja tsun wa ai. “Myen Mung na Mung Masa gaw hkring taw nga ai grai na sai. Ya she loi shamu wa ai hpe matut kanawng lawm na grai ahkyak nga ai.”
Dr. Tu Ja matut tsun ai hta, n’dai lang na NC gaw Up Hkang lam hte Tara Dawdan lam ni hpe madung tawn bawngban sa wa na hte maren shawng lang na bawng jahkrup tawn ai Upadi hkrang hte Daru Magam garan kachyan lang na lam ni hpe mung bai jahtuk sa wa na re lam chye lu ai. Laiwa sai 2004 ning May shata hta galaw ai NC hte simsa lam la da ai Amyusha rawtmalan hpung ni gaw Myen mungdan a Daru Magam garan kachyan lang na lam hpe bawng jahkrup na matu tang madun wa sai raitim, Myen hpyen du ni gaw hpa mahtai n jaw shi ai rai nga ai.
February 17 ya hta hpang na NC hta KIO hku n’na dat kasa galai shai ai lam n nga ai sha shang lawm na rai nga ai. Dai hte maren Kachin Defense Army, KDA, hte New Democratic Army-Kachin, NDA-K, ni mung shang lawm na re lam chye lu ai. Raitim, NDA-K na dat kasa marai mi yawm mat na re majaw dat kasa 4 sha sa du na lam chye lu ai.
Ya ten hta, Myen hpyen atsuya gaw Daru Magam ahkang aya hpe Mung shawa de tau su su ap ya nga ai ten mung rai n’na, shanhte mung sari rawng ai hku Daru Magam kawn yu mayu ai lam mung re lam, Dr Tu Ja tsun ai. Matut n’na shi gaw, Jinghpaw Wunpawng amyusha ni yawng a matu myit hkrum lam lu la hkra gaw Wunpawng Amyusha Mungbawng Rapdaw, WMR, hpe hkungga ra ai lam tsun ai. N’dai WMR hpe KIO hku na tek jum ai lam n nga ai, nga n’na mung tsun jahpra dan ai.
“KIO gaw manai makai re ai baw mung masa tsep kawp n galaw na ga ai, ya prat gaw makoi magap da ai baw n rai mat sai, brang lang prat re majaw anhte hpe mung dinglun mai ai,” ngu Dr. Tu Ja tsun ai.
