Myitkyina kaw Internet Café Hpaw
The Kachin Post / December 27, 2006

Jinghpaw mungdaw mare daju Myitkyina muklum hta, lai wa sai December shata 23 ya shani hta Internet Café ningnan langai hpe hpaw hpang sai rai nga ai.

Myitkyina kaw Internet hpe Dial-up Connection hte lang nga ai gaw 4 ning ram na sai raitim, ya na zawn, Broadband hku lang lu ai Internet Café gaw shawng ningnan lang rai nga ai.

Ya na broadband Internet café hpe Jinghpaw amyu sha rai nga ai N’joi Naw Seng woi awn let hpaw hpang dat ai rai nga ai. Dai hpaw poi hta Jinghpaw amyu sha ni hta n’dai zawn chye galaw sha wa ai nau n nga shi ai re majaw masha ni yawng mung grai myit shang sha let sa lawm shajang ma ai. N’jang Kawng Buga Hpung Up Rev. Mading Zung Kyang hku na Mungga htawn let akyu hpyi ya ai rai nga ai.

N’dai Myitkyina kaw na Internet Café gaw iPstar phone hte matut lang ai rai n’na, ya ten Myen Mung kaw Broadband hku na Internet hpaw ai ni law malawng mung iPstar Telephone line hte matut mahkai da ai rai ma ai.

Manghkang langai mi sha nga ai, dai gaw Mihprap Wan hpe atsawm hkrak n lu lang shi ai majaw Wanjak sharawt n’na jaksau n hkyem sa nga malu ai. Dai majaw, hkying hkum mi hta Internet lang shabrai Myen gumhpraw lap 1,000 mi jaw ra ai lam, chye lu ai.

N’dai Internet Café a yaw shada ai lam gaw anhte Wunpawng amyu sha Ramma ni law malawng Internet lang let Mungkan hpaji hkaja lu na matu hte, shada da laika ka matut mahkai hkat lu na matu yaw shada ai rai nga ai.

Internet hte E-mail lang ai majaw Jinghpaw Wunpawng ramma ni Jinghpaw Laika grau n’na kungkyang wa ai lam nga ai, nga n’na dai hpaw poi kaw sa du ai rama langai tsun wa ai.