Myitkyina kaw Motor Cycle ni hpe Rim
December 20, 2005

Myitkyina Uyen

Myitkyina grup yin e Without Motor Cycle ni hpe n’dai shata praw kawn rim nga ai rai nga ai. N’dai zawn hpa mung sadi n jaw ai sha lam n maw e hkap let — tsi rung de machyi masha htaw sa ai ni hpe pyi hkyem sa n jaw ai sha — lai wa lai sa ni hpe hkan rim la nga ai majaw mare masha ni yawng hkrit gari let nga taw ma ai.

Ya ten du hkra rim da ai Cycle ni yawng 400 daram rai sai lam chye lu ai. N’kau ni gaw n’ta kaw lang ra ai majaw gumhpraw n lu tim shakut shakat rai mari da ai re majaw, ya na zawn hpa pyi n chye dat ai sha rim katut mat ai majaw grai yawn nga ai lam chye lu ai.

Cycle law malawng gaw Jawngma ni hpe htaw wa htaw sa galaw nga ai ni rai n’na, Jawng lung nga ai jawng ma ni mung jawn hpa n lu mat ai majaw grai jamjau nga ma ai.

Ya na masing gaw, Jinghpaw Wunpawng sha ni law malawng shanu nga ai Shatapru a lahta daw lam n maw ni hkan grau n’na hkap rim nga ai rai n’na, Myen Hpyen Dap daju nga ai Myitkyina a sinna maga de lam n’maw kaba de gaw n hkap rim ai lam chye lu ai.

N’kau ni mung, galoi she bai shaw shangun kun? ngu myit mada let balik dap de shani shagu sa sagawn hkawm nga ai majaw gumhpraw htum, aten htum rai kyin taw nga ma ai lam chye lu ai.

Grau n’na, rim la lu ai Motor Cycle ni hpe Myen mung a muklum mare ningnan Pyinmana hta lang na matu Myitkyina kawn wanleng hte htaw shalai nga ai lam chye lu ai. Pyinmana mare gaw laiwa sai shata kawn Muklum daju shatai na matu Yangon mare kaw na Myen hpyen atsuya rung ni hpe htawt sit nga ai re majaw, dai mare de htawt sit magam gun na atsuya rung mugun ni hpe Cycle langai hpra majoi jaw na lam chye lu ai. Pyinmana kaw nga n’na atsuya mugun ai ni hpe ya mung shawa kaw na rim da ai, grau n’na Jinghpaw mungdaw kaw na rim la lu ai Cycle ni hpe shalai jaw na lam chye lu ai.

Lai wa sai ten hta Myitkyian mare kaw, Without Motor Cycle ni hpe n’dai zawn sha rim la n’na bai n jaw ai sha, hpyen dap kaw hpyen n’sam (atsit nsam) chya let lang nga ma ai hpe yawng gaw myi hte mu, na hte na nga ai ten hta n’dai zawn Cycle ni hpe bai rim la ya ai majaw Myitkyina mare masha ni gaw grai yawn madai nga ai lam chye lu ai.

N’dai Without Cycle ni hpe Myen hpyen dap Dingdung Ginjaw Du kaba Maung Maung Swe prat hta Jawngma langai mi Cycle langai Miwa hkran na mari la lu ai nga ai majaw mare masha yawng mari jawn ai rai nga ai.