Hkristan Hpung Poi Ni Galaw Na Yak Nga December 13, 2005
Myitkyina Uyen
Myitkyina grup yin hkan e dai ning gaw Hkristan Hpung Poi ni galaw na matu yak hkak nga ai lam chye lu ai. Hpa majaw nga yang, Myen Hpyen Atsuya gaw poi lamang galaw shagu jep joi nga ai rai n’na, poi galaw woi na ni n gwi na zawn re ai lam ni law law byin pru nga ai.
Jinghpaw mung buga shara n’kau hkan Martial Law shapraw da ai majaw shana hking 9:00 kawn n’ta kaw na kadai n pru gwi nga ma ai rai nga ai. Shaning shagu November shata hkan shaning shagu galaw nga ai Chyeju Dum Poi (Thanks Giving Day) zawn re ai poi lamang ni hta pyi Balik ni sa san sagawn shingtsang ai majaw hpung salang law malawng gaw Hkristmas poi woi galaw na pyi hkrit tsang nga ma ai.
Shaning shagu December shata du shagu Hkristmas mahkawn hkawn hkawm ai Carol Singing uhpung ni a n sen ni shara shagu na lu ai raitim, dai ning gaw katsi katsang she nga taw ai hpe mu lu ai.
Laiza hte Waimaw lapran na Kang Dau Yang Mare kaw mung, KIO a Hka Wan Jak (Mali Hka) kaw na pru ai Myi Hprap Wan hpe mawdaw lam a pai hkra kaw lahta maga na Gawk-ngu Hpra kaji hta gaw Myi Hprap wan htoi kabrim hkra lu n’na, lam a lawu maga na Hkristan Hpung Nawku jawng kaba kaw gaw Myi Hprap wan n lu taw ai hpe mu chye lu ai.
Du na 2006 ning kaw galaw na rai nga ai Jinghpaw Wunpawng Hkalup Hpung Ginjaw, KBC a 106 lang na Hpung Shawa Zuphpawng hpe March 28, 2006 kawn April 3, 2006 du hkra hpung shawa 30,000 ram hte Sama Ginwang Katsu Mare kaw wu wu di di galaw na rai nga ai. Dai poi a matu KIO a Mali Hka Wan Jak kawn Myihprap wan jaw na lam hpe mung Myen Hpyen atsuya hku n’na Myitkyina de shawng n jaw ai sha gara de mung n jaw shangun ai majaw re lam chye lu ai.
Kaja wa nga yang Katsu Mare kaw du hkra Wan Sumri ni yawng gran ngut sai rai nga ai. Myi Hprap Wan jaw na rai yang mai jaw sai madang rai nga ai. Dai hpung shawa zuphpawng a Myi Hprap Wan a matu Budget gaw Sen 60 ram rai nga ai. Lama wa Mali Hka Wan Jak kaw na Wan lu jaw ai rai yang dai alu gumhpraw ni hkyem sa na rai nga ai. Dai sha n ga KIO a Hka Wan Jak masing mung Mung shawa a matu shawng ningnan akyu jaw lu ai rai nga ai.
