N’gum La Hka Wan Jak Gaw Gap ai hta Yak Nga
December 6, 2005

Myitkyina Uyen

Jinghpaw mung Malihkrang Walawng na N’gum La mare hta gaw gap nga ai Hka Wan Jak (Hydro Power) gaw Myen hpyen atsuya a pat shingdang ai majaw ngut shakre lu na matu yak nga ai lam chye lu ai. N’dai N’gum La Hka Wan Jak gaw Wunpawng Mungdan Shanglawt Hpung, KIO, Ginjaw a masing hte galaw nga ai Buga Gaw sharawt masing langai rai nga ai.

Ya ten hta Myen hpyen atsuya hku n’na N’gum La Wan Jak galaw na matu ra ahkyak nga ai Bilat Ga (Concrete) hpe Myitkyina kawn n htaw shalai shangun ai rai nga ai. Wan Jak hpe lai wa sai November shata kawn galaw hpang na matu yawng bungli shajin da ngut sai raitim, Bilat Ga n lu ai majaw bungli jahkring da ra ai lam, N’gum La Wan Jak gaw gap lit hkam Salang Lahtaw Tang Ra tsun ai.

Bilat ga hpe Myitkyina kawn n mai htaw ai majaw, Miwa hkran hku n’na htaw nga nga yang mung, shawng de hpun htaw shalai ai lam ni hkan mawdaw n mai hkawm na lam, mawdaw hkawm ai n’sen na yang sinat hte gap sat na ngu Myen Hpyen dap kawn Martial Law shapraw da ai re majaw n mai byin ai lam chye lu ai.

KIO hku n’na ya ten hta Jinghpaw mung shara n’kau hkan Hka Wan Jak (Hydro Power) galaw nga dingyang rai nga ai. Hka Wan Jak gaw anhte buga rawtjat lu na matu grai ahkyak ai sut rai langai rai nga ai. Raitim, Myen Hpyen asuya gaw shanhte a ahkang n lu ai sha hpa masing hpe mung n mai galaw ai lam shagrin mayu ai majaw Hka Wan Jak galaw ai lam hpe pat shingdang wa ai hpe chye lu ai.