Pan Kachin N teng ai N’dau Shabra Laika Shale
August 28, 2005

The Kachin Post

Jinghpaw mung Maija Yang mare kaw rung jung ai Jinghpaw Wunpawng Amyu Sharawt Hpung, Pan Kachin Development Society (PKDS), gaw The Kachin Post a August 18 ya shani na “Hpung Sara Marai 3 Jep Katut” ngu ai shiga hpe shut ai lam, n teng n man ai hku n’dau shabra laika shapraw dat sai rai nga ai.

The Kachin Post a “Hpun Sara Marai 3 Jep Katut” shiga gaw Rev. Maran Ja Gun (Jinghpaw Wunpawng Chyum Kawlik), Rev. Pungga Ja Li (Wunpawng Ningja Jawng Up) hte Sara Marip Bawk San (Nawng Nang Chyum Kawlik) ni hpe Myen hpyen kaichyan ni san jep ai lam hpe shiga ka da ai rai nga ai. N’dai shiga hpe Sara Marip Bawk San nan Myitkyina na The Kachin Post a reporter hpe tsun dan n’na ka da ai rai nga ai.

Sara marai 3 hpe san jep ai lam a madung gaw, Myitkyina-Laiza lam lapran rim katut ai jawng ma marai 3 a matsun dat ai majaw rai nga ai. Ngut n’na n’dai jawng ma marai 3 rim katut ai lam hpe Radio Free Asia a Myen shiga dap hta mung shapoi ngut sai rai nga ai.

Dai hta Wunpawng Mungdan Shanglawt Hpung, KIO, salang n’kau myi gaw jawngma marai 3 hpe “Langji U E Pyen Yu Su” ngu ai magazine gun shalai ai majaw rim katut ai ngu na sha chye na da ma ai.

Jinghpaw Wunpawng Amyu Sharawt Hpung a ya ten na ningbaw rai nga ai Salang N’sang Tu Awng hpe PKDS a n’dau shabra laika hte seng n’na san yu ai shaloi, shi hku n’na The Kachin Post a shiga hpe n teng ai ngu n’na n ka shangun ai lam hte “Langji U E Pyen Yu Su” magazine hpe PKDS kaw na shapraw ai n re ai lam hpe sha ka shangun ai re lam tsun ai.

N’sang Tu Awng hku n’na n’dau shabra laika shapraw na matu matsun jaw ai lam a madung gaw, Myitkyina-Laiza lam lapran rim katut ai jawngma marai 3 hte seng n’na KIO ningtau ningbaw Du Kaba Gauri Zau Seng hku n’na shi hpe san sagawn wa ai majaw re lam chye lu ai.

N’dai n’dau shabra laika hpe ka ai PKDS Environment Project Coordinator Hkaw Lwi tsun ai hku rai yang, The Kachin Post a August 18 ya shiga a majaw PKDS hte Wunpawng mungdan Shanglawt Hpung, KIO, ni kata lam manghkang byin mat ai lam chye lu ai. PKDS a project ni hpe KIO a uphkang ginra ni hta galaw nga ai rai nga ai.

“Langji U E Pyen Yu Su” magazine gaw anhte Pan Kachin Development Society kaw n’na shapraw ai n re ai hte Myu Tsaw Salum Magazine dap kaw na shapraw ai she re ai lam hpe Hkaw Lwi hku n’na The Kachin Post hpe bai sang lang dan ai. Raitim, PKDS hte Myutsaw Salum Magazine dap ni gaw Sut Du Bawmwang La Raw madi shadaw nga ai magam dap ni rai nga ai.

Hpa myi raitim, Myitkyina na ni gaw “Langji U E Pyen Yu Su” ngu ai magazine hpe Pan Kachin kaw na shapraw ai hku sha chye na nga ma ai. Ngut n’na, KIO salang n’kau myi mung “Langji U E Pyen Yu Su” gun shalai n’na rim katut ai jawngma marai 3 hpe Pan Kachin kaw na shangun hku n’na chye na nga ma ai.

The Kachin Post a hti shawa n’kau mi mung PKDS gaw The Kachin Post shiga dap a shari shadang hpe jahpoi jahpyak mayu ai majaw n teng ai hku n’na n’dau shabra laika shale ai re ngu n’na chye na nga ma ai.


 
HomeNewsEditorialOpinion/AnalysisArticleCultureInterviewNews DigestLetter to the Editor
 
     
 
Copyright © The Kachin Post. All Rights Reserved. Established in 2002.