JLH Mandalay Htung Hking Madun Poi Galaw
August 25, 2005

The Kachin Post

Jinghpaw Wunpawng Laili Laika hte Htung Hking hpung Mandalay Dakkasu ni kawn woi awn let “Kachin Culture Show” hpe Myen mung Mandalay mare hta August 20 ya hta awng dang ai hku galaw ngut sai lam chye lu ai.

Marai 400 daram du sa n’gun jaw ai n’dai poi hpe Mandalay mare na Swan Hotel Hall hta galaw ai rai n’na Dakkasu jawngma tsawm shayi marai 21 shang shingjawng ai rai nga ai.

Poi hta Dakkasu jawngma ni a Dawraw (violin) dum ai lam, Wunpawng amyu lakung 6 a Bu Hpun mawn sumli ai lam ni hpe mung galaw ai lam chye lu ai. Monywa hte Mekhtila Dakkasu kaw na mung ka hkrang ni hte shang lawm hpe chye lu ai.

Dai ning na Tsawm shayi ni gaw No I hpe Monywa Dakkasu na tsawm shayi, No II hte III hpe Mandalay Dakkasu na tsawn shayi ni lu ai rai nga ai.

Raitim, Dakkasu jawngma law malawng gaw Poi shang lekmat manu hpu ai majaw n lu sa yu ai lam chye lu ai. Poi lek mat langai hpe Myen gumhpraw 2000 kyat hte 4000 kyat hte dut ai rai nga ai.

N’dai zawn re ai Htung Hking madun poi hpe maning 2004 August 14 ya hta JLH Mandalay ni woi galaw sai rai nga ai.