Myitkyina kaw Ma Kaji ni Grai Machyi Nga
August 19, 2005

Malihkrang Uma

Ya ten Myitkyina Muklum kaw Ma kaji ni Jigrawng a majaw byin ai Sai Htaw Ana (Haemorrhage Dengue Fever) grai sawng nga ai hte maren Ma kaji ni asak sum ai pyi grai law wa sai lam chye lu ai. Myitkyina na Ma Kaji Tsi Rung kaw mung shara she n shang mat n’na byin mai ai hku Machyi ma ni hpe shara jaw ra nga ai rai nga ai.

Ma kaji hte seng n’na laksan tsi lajang ai Tsi Sara ni a tsi gawk hkan mung poi zawn she rai n’na kanu kawa ni tinang kasha ni hpe sa tsi nga ma ai hpe mu lu ai. Dai lam a majaw, Myitkyina kaw nga ai Kanu Kawa ni gaw kajawng kaja rai n’na jahta hkat nga ma ai.

N’ta shagu na Ma kaji ni hpe grai sadi jaw nga ding yang rai nga tim, ya du hkra hkyam sa ai lam n nga shi ai lam chye lu ai.

N’dai lam hte seng n’na, Myitkyina Muklum hkam ja dap hku n’na ahkyak la ai lam n nga tim, mare kata hkan nga ai hkamja dap mu gun Tsi Saranum ni gaw dangdi dangdep ai daram tinang a mare grup yin hkan yu gawan let, Jigrawng kraw chye ai shara, hka rawng ai shara hte hka nawng ni hpe jasan jaseng kau na lam hkan tsun ma ai.

N’kau kanu kawa ni gaw Laika jawng de pyi tinang kasha ni hpe n sa shangun sai lam chye lu ai. Shada da kap hkat mat n’na yak wa ai lam a majaw re, nga tsun ma ai.

N’dai zawn byin wa ai lam gaw, anhte buga kaw moi de gaw Jigrawng tsi ni hpe shaning shagu hkamja dap kaw na lit la gat ya ai raitim, n’dai daw de Jigrawng tsi gat ai lam n nga mat ai daram re majaw Jigrawng ni grai law wa n’na hkamja lam ningra wa ai rai nga ai.