Hpung Sara Marai 3 Jep Katut
August 18, 2005

Myitkyina Langji

Myitkyina mare na Hkalup Hpung Sara marai 3 hpe August 15 ya hta Myitkyina Balik dap hte Myen hpyen kaichyan ni pawng let san jep ai lam chye lu ai.

Mabyin masa gaw, Myikyina-Laiza lam lapran na Gate langai mi kaw, Jawngma marai 3 a arai kata kaw na Jinghpaw VCD hte Pan Kachin kaw na shapraw ai “Langji U E Pyen Yu Su” nga ai Magazine ni hpe jep mu la ma ai. Ngut n’na laika ngau hpyi ai laika ni hpe mung mu tam sawk let kadai hpe jaw na lam san yu ai shaloi, Myitkyina kaw na Rev. Maran Ja Gun, Rev. Pungga Ja Li, hte Sara Marip Bawk San ni hpe jaw na lam tsun dan ma ai.

Dai majaw, lahta na Hpung Sara marai 3 hpe Myen Balik hte hpyen kaichyan ni n’ta di sa shaga la let, san jep ai lam chye lu ai.

Rev. Maran Ja Gun gaw Jinghpaw Wunpawng Chyum Kawlik (KTC, Nawng Nang) a hpaji up mung rai n’na, Maisakwang Nawku hpung a hpung up sara kaba mung rai nga ai.

Rev. Pungga Ja Li gaw moi de N’jang Dung Buga hpung a Hpung up sara kaba rai n’na, ya ten hta Wunpawng Ningja Jawng (Kachin Institute of Culture and Arts) a htunghking hte seng ai hpaji up mung rai nga ai.

Sara Marip Bawk San gaw Nawng Nang Chyum Kawlik (Kachin Theological College) jawngma shakat fund a myit sharawt lithkam mung rai n’na, Wunpawng Ningja Jawng a sharin sara mung rai nga ai.

Myen hpyen atsuya gaw Jinghpaw Wunpnaw laili laika rawtjat galu kaba wa na lam shagu hpe pat shingdang nga ai ni rai nga ai. Lai wa sai February shata kawn Myen hpyen uphkang ai nig aw Jinghpaw yungwi n’sen hte Karaoke VCD ni tara shang dut shabra ai lam ni hpe pat kau sai rai nga.