Chaing Mai kaw Hka Kaba
August 15, 2005

Naw Awng/ Chiang Mai

Thai mungdan Chiang Mai mare ka-ang hkup ngu na daram hka kaba hka lim byin taw nga ai majaw Chaing Mai nga Jinghpaw Wunpawng amyu sha ni hte Myen mung masha ni mung rai htawt, shingbyi shara htawt sit rai jam jau nga ma ai.

Chiang Mai mare ka-ang hku lwi lai nga ai Mae Nam Ping hkanu kaba a hkahku de marang grai htu ai majaw hkanam de n’dai zawn hpyen tai wa ai rai nga ai. Ya hka tung nga ai maga de gaw, anhte Jinghpaw Wunpawng Sha ni kanoi yawng ngu na daram nga ai maga de rai nga ai. Chiang Mai mare kaw Wunpanwg sha ni marai 1000 daram nga ai rai nga ai.

Jinghpaw Wunpawng sha ni hta gaw, Hka kaba ai marang e hkala n’ba hkrum ai lam ya du n nga ai. Thai masha marai 2 gaw, myi hprap wan kahprup hkra n’na si ai lam chye lu ai. Hka hpyen a majaw hkala n’ba si ai lam gaw, hka naw tung nga ai majaw n’lu sawk sagawn shi ai lam chye lu ai. Hka nu hte ni ai n’ta, hotel, mawdaw, cycle ni hte kaga sutgan arung arai ni tsawm ra yawng lawm mat sai rai n’na ya du hka garai n yawm shi nga ai.

Thai hkringmang daju Dr. Thasin Shinawatra mung wa du gawan n htawm, hka hpyen a majaw jam jau hkrum nga ai ni hpe garum shingtau let tsi mawan ni hpe lajang ya nga ai.