Nawng Nang Chyum Kawlik kaw Ramma Hpawng Galaw
August 09, 2005

Malihkrang Uma

Ramma hking mi jan shang lawm ai Wunpawng Ramma Kanawn Mazum Hpawng kaba hpe Jinghpaw Wunpawng Chyum Kawlik (KTC, Nawng Nang) na AD 2000 Masat Gawknu kaw August 6 ya hta galaw lai wa sai.

N’dai lamang hpe gaw KTC Jawngma Kazawn Mazum Committee kaw n’na woi awn let, Myitkyina Dakkasu Ni (JLH) hte pawng gumhpawn let galaw ai rai nga ai. Myitkyina grup yin na Hkristan Hpung shagu, Chyum Jawng shagu hte Dakkasu shagu na Ramma ni shang lawm ma ai.

Lakjet hpe gaw Prof. Hpauyam Bawk Ja hte Rev. Maran Ja Gun hku n’na July shata hta galaw ai JLH (Myitkyina Dakkasu Ni) ni a Laili Laika Hkaw Tsun Hpawng kaw hkaw tsun ai lakjet ni hpe alak mi bai jahkum shatsup let hkaw tsun ai rai nga ai.

“Lai wa sai hkaw tsun hpawng hta gaw masha nau n law ai majaw tang n du ai zawn nga tim, n’dai lang na gaw kraw hta she zaw nga mat sai,” nga n’na dai kaw shang lawm ai myitsu langai tsun wa ai.

N’dai ramma hpawng hta du sa ai ramma ni gaw (1) N’gun Kahkyin Pawng Hpawm Ai A Akyu Ara, (2) Wunpawng Ramma Jet A Maka Kumla, (3) Magam Myit Jasat Hte Lit La Gwi Ai Ramma, (4) Anhte A Kanau (Pang) Ni A N’tsa Tawn Da Ra Ai Myit Jasat, (5) Du Na 2020 Ten Na Wunpawng Myusha Hte Buga, (6) Daini Na Kanawn Mazum Hpawng A N’tsa Mu Mada Ai Lam ngu ai ga baw ni hpe madung dat bawngban ai lam chye lu ai.

Ramma hpawng a matu Myen gumhpraw sen 20 jan masat n’na jai lang ai lam chye lu ai.