Sam Mung Shanglawt N’dau
April 19, 2005

The Kachin Post

Maigan nga Sam ningbaw ni woi awn let Sam Mungdan Atsuya gaw de dat sai lam hte Sam Mung Shanglawt lu mung dan re lam n’dau dat sai hpe, Shan Herald Agency for News shiga dap hku chye lu ai.

“Sam mung chying sha yawng a mying ningtsa hte myit mang ai lam ni a majaw,” n’dai zawn n’dau dat ai re lam Sam mung atsuya a ningbaw Surkhanpha tsun wa ai. Sam mung shanglawt lu lam hpe April 17 ya hta n’dau ai rai nga ai.

Sam mungdan atsuya hpe Sam hkawseng shadang Surkhanpha hku n’na ningbaw tai let, Australia mung dan nga Khun Hom gaw Maigan kit hkai Hkringmang lit la n’na hpaw hpang dat sai rai nga ai.

Surkhanpha gaw Myen mung shanglawt lu ai hpang shawng ningnan Gumsan Magam tai wa ai Sao Shwe Thaike a kasha kaba htum rai n’na, 2004 ning hta n nga mat sai Dr Chao Tzang Yawnghwe hte Euro Burma Office Director Harn Yawnghwe ni a kahpu kaba mung rai nga ai.

Sam mung atsuya ningbaw ni hpe Sam mung mare 48 na dat kasa 48 a ra-lata ai hte maren magam ap ya ai rai n’na, ningbaw ni hpe Sam mung hte maigan nga Sam uhpung uhpanwg ni mung madi shadaw ma ai lam chye lu ai.

Raitim, March shata kawn United Wa State Army hte majan byin nga ai Col. Yawdserk a Shan State Army gaw Sam mung atsuya hte seng n’na hpa tsun shaga ai lam n nga shi ai rai nga ai.

Laiwa sai bat hta, Myen hpyen atsuya hte gap hkat jahkring da ai Shan State National Army, SSNA, a Dap Ba 11 na ningbaw Kan Na hte shi a hpyen ma 170 jan gaw Myen hpyen dap a shagyip shagyen ai hpe ningdang n lu ai majaw lak nak jahkrat mat sai rai nga ai.

Dai hte maren Myen hpyen atsuya gaw Sam ningbaw ni rai nga ai Shan State Peace Council, SSPC, ningbaw Gen Hso Ten, Shan Nationalities League for Democracy, SNLD, Tingnyang Up Hkun Htun Oo hte Ninggawn Amu Madu Sai Nyunt Lwin, hte New Generation Shan State Party kaw na marai 4 hpe lai wa sai February shata hta rim rawng kau sai rai nga ai.