Visionary Concert Myitkyina kaw Galaw
April 5, 2005

Malihkrang Uma/ Myitkyina

Lahkawng lang ngu na Visionary Concert hpe April 3 ya shana hta Myitkyina mare na Geis Hkalup Nawku Htingnu hta galaw mat sai. Concert hpe Lakum Hkawng Hawng hku n’na shi a Dawraw (Violin) dum shapyaw ya ai rai nga ai.

N’dai zawn re ai Dawraw dum poi (Violinist Show) gaw anhte Jinghpaw Wunpawng buga ginra hta shawng ningnan na lang galaw ai lam rai nga ai. Raitim, Hkawng Hawng a matu gaw lahkawng lang ngu na poi rai nga ai. Shawng ningnan na madun poi (First Visionary Concert) hpe gaw Yangon mare kaba Jinghpaw Wunpawng Hkalup Hpung Nawku Jawng kaw galaw sai lam chye lu ai.

Hkawng Hawng gaw dai ni na ten hta Myen Mung ting hta byin dik ai madang kaw nga ai wa rai nga ai. Kaga amyu sha, Karen amyu sha Dawraw Sara kaba Thra Tamalar Wah (Yangon mare Insein lawk, Hkawe Chan kaw na) mung Hkawng Hawng hpe Myen Mung hta byin dik re nga n’na tsun ga sai hpe chye lu ai.

“N’dai poi yu n’na mi prwi si she hkrat wa ai, anhte Wunpawng sha ni mung n’dai ram madang rai wa nga sahka ngu n’na le,” ngu Myitkyina Dakkasu Saranum mung rai n’na, Jinghpaw Wunpawng Laili Laika hte Htunghking Hpung (Myitkyina Dakkasu) a ningbaw Kumje Roi Ja tsun wa ai.

Myikyina kaw galaw ai Poi tung hta, Hkawng Hawng gaw shi a chyinghkai kawa Lakum Dau Hkawng hte ningshawng sharin Sara rai nga ai Dawraw Sara Brang Tawng hpe a’lak mi chyeju dum masat masa galaw ai mung mu lu ai.

Yungwi ninghkring Ah Tang hte Plus 3 Yungwi hpung na Myu Let ni mung mahkawn garum n’na, dum sumpyi hpung ni hta N’ja Tang (Amazing, Bass), Seng Awng (Amazing, Drum), Kyang Nu (Guitar), hte Chying Chying (Key Board), hku shang lawm ma ai.

N’dai Dawraw poi hta, Myitkyina grup yin na Dawraw dum ramma ni law law hte Jinghpaw Mungkan na yungwi ninghkring ni law law mung sa du n’gun jaw ai hpe mu lu ai.

Lakum Hkawng Hawng gaw Jinghpaw mahkawn Album law law ni hta mung Dawraw dum bang ai wa rai nga ai. ‘Better Vision’ ngu ai Hpaji Shakat Fund myit sharawt Series hta shi dum bang ai atsam hpe a’lak mi madat mai ai rai nga ai.