N’ba Pa Mayan hta Lahta Tsang Mung Shawa Kongsi ni Masha Lahkawn
January 29, 2005

The Kahin Post

Lahta Tsang Mung shawa Kongsi (KIO) hpung ni N’ba Pa Zup hte makau grup yin hkan masha hkan lahkawn nga ai hte, masha tawm ra kahkin lu sai lam hpe, dai mare masha ni tsun wa ma ai.

N’dai hku masha lahkawn ai hta, shata shabrai Myen gumhpraw sen 2 jaw na ngu n’dau let masha kahkyin ai majaw hpawmi n’kau mi pyi ma ba let hkan nang ai lam chye lu ai. Raitim, hkan nang ai masha n’kau gaw Miwa Gumsan mung Ruili mare kawn bai n’htang mat wa ai ni mung lawm ma ai.

Lahta Tsang Mung Shawa Kongsi a masha hkan lahkawn ai marang e, dum n’ta dinghku n’kau hta madu jan, madu wa myit n rum hkat wa ai majaw dinghku n ngwi n hpyaw ai lam ni dinghku n’kau hta byin pru wa nga sai lam hpe mare masha ni kaw na na chye lu ai.

Du Kaba Lasang Awng Wa woi awn ai Lahta Tsang Mung Shawa Kongsi gaw 2004 ning January shata Wunpawng Mungdan Shanglawt Hpung ginjaw hta manghkang byin ai majaw htingbren pru mat wa ai rai nga ai. De hpang Pang Wa mare na New Democratic Army-Kachin a ginra hta shanu let, masha n’gun shagreng wa na matu Miwa Gumsan mungdan, Lahta Sam mung hte Jinghpaw mung lamu ga jarit na mare n’kau hkan masha lahkawn nga ma ai.