Myen Hpyen Atsuya a Road Map Awng Dang lu hkra Shang Lawm na Lam KIO Sadi Jaw
January 25, 2005

The Kachin Post

Wunpawng Mungdan Shanglawt Hpung, KIO, gaw Myen hpyen atsuya a mung masa lam matsun 7 (Road Map) hkrang shalat galaw sa wa ai lam hta awng dang wa lu hkra shang lawm na lam sadi jaw ai hpe, The New Light of Myanmar shi laika hta ka da nga ai.

N’dai ga sadi hpe KIO ningbaw malai Du Kaba Gauri Zau Seng hte hpung ni Myen Hpyen atsuya a amu madu I Lt-Gen Thein Sein a hpung ni Yangon mare hta hkrum ai shaloi jaw ai rai nga ai. Gauri Zau Seng hte Thein Sein gaw January 23 ya hta Yangon mare na Dagon Yeikhta kaw hkrum shaga ma ai rai nga ai.

“Jinghpaw Wunpawng amyu sha yawng hte anhte a uhpung yawng gaw Myen hpyen atsuya masat tawn da ai mung masa lam matsun 7 awng dang wa lu hkra shanglawm na re,” ngu Gauri Zau Seng tsun wa ai lam The New Light of Myanmar shi laika hta mu lu ai. “Ya ten hta Jinghpaw Wunpawng amyu sha ni gaw Myen hpyen atsuya n’dau tawn ai mung masa lam matsun 7 hpe madi shadaw ai hte maren National Convention hpe shang lawm nga ai.”

Dai shani na hkrum shaga ai hpawng hta KIO kaw na Du Kaba Gauri Zau Seng hte Dr. La Ja ni hte rau Sara Saboi Jum hte Salang Hkun Myat ni mung shang lawm ai rai nga ai.

KIO gaw Myen hpyen atsuya a mung masa lam matsun 7 hpe shawng ning nan madi shadaw ai hpung rai nga ai n’na, 2004 ning May shata hta galaw ai National Convention hpe shang lawm wa sai rai nga ai. Dai hte maren 2005 February 17 hta bai galaw hpang na National Convention hpe mung shang lawm na lam sadi jaw da sai rai nga ai.