Maung Aye a Asak Sin Langai Sat Hkrum
January 24, 2005

The Kachin Post

Myen Hpyen atsuya a No 2 kaba htum ai General Maung Aye a asak sin hpyen du langai Yangon mare na Myen Hpyen Ginjaw rung kaw sat hkrum ai lam, Democratic Voice of Burma, DVB, shiga hku chye lu ai.

Lt-Col Bo Win Tun, asak 42, gaw January 21 ya shana Hpyen Ginjaw rung kaw magam gun nga ai ten hta n’hkyi hte galun sat hkrum ai rai nga ai. DVB shiga hku rai yang, 2004 ning hta magam gun shara na jahkring kau hkrum ai Gen Khin Nyut hte ni nawn ai hpyen du langai gaw Bo Win Tun hpe sat kau ai re lam tsun da nga ai. Bo Win Tun gaw Gen Maung Aye a asak hpe makawp maga nga ai laman sat hkrum ai mung mai byin ai lam, shiga hta matut ka da nga ai.

N’dai lam hte seng n’na Myen Hpyen atsuya gaw hpa tsun shaga ai lam n nga tim, January 23 ya shapraw ai The New Light of Myanmar shi laika hta Bo Win Tun a mang makoi poi hpe dai shana de Mingaladon lupwa hta galaw na lam makoi mayang shiga lawm pru wa ai rai nga ai. Bo Win Tun gaw magam gun nga ai laman si mat ai re lam hpe shi a n’ta masha ni mung tsun pru wa ma ai.