Lahta Tsang Mung Shawa Kongsi ni Hpai Da Dabang ni hpe Gumhpraw Hpyi Jahkrit January 23, 2005
Ningma Kap
Pang Wa mare makau hta shamu shamawt nga ai Lahta Tsang Mung Shawa Kongsi (KIO) gaw Mai Ja Yang mare na Hpai Da dabang madu ni hpe gumhpraw hpyi lajin da ai lam, Hpai Da dabang shiga lawk hku chye lu ai.
Lahta Tsang Mung Shawa Kongsi shabra ai matsun laika hta, January shata 19 ya kawn 21 ya laman hpaida dabang na lau ban ni yawng gaw shanhte hpyi ai gumhpraw lawm let masat da ai shara de sa du jaw ya na matu matsun jaw da n’htawm, n hkan shatup ai lauban ni hpe gaw January 25 ya hpang jahtum tawn let Mai Ja Yang mare kaw n’na pru mat ra na re lam tsun da nga ai. Hpyi shawn da ai matsun hte maren n galaw ai rai yang, hpang de byin wa ai manghkang ni gaw Hpai Da dabang ni a lit sha re ai lam, dai laika hta matut ka da nga ai.
N’dai matusn laika hpe Hpai Da dabang 14 hpe garan ai rai nga ai. Dai laika hte seng n’na Hpai Da dabang lau ban ni gaw Wunpawng Mungdan Shanglawt Hpung, KIO, a Mai Ja Yang uphkang rung de sa du bawng ban ai lam, dai rung na lit hkam langai tsun wa ai. Hpai Da dabang na lau ban ni mung n’dai lam hte seng n’na uphkang rung de sa bawng ban ai lam chye lu ai.
“Madung gaw KIO hpe ninghkap ai ga re,” ngu Mai Ja Yang mare na KIO magam gun langai tsun ai.
Mai Ja Yang hpaida dabang hta company 14 daram nga ai rai n’na company langai a n’tsa yawm dik miwa gumhpraw sen 4 kawn sen 16 du hkra hpyi ai lam, Mai Ja Yang uphkang rung na lit hkam langai tsun wa ai. Dabang ting rai yang n law htum sen 120 hpyi ai rai nga ai.
N’dai mabyin hte seng n’na Mai Ja Yang uphkang rung gaw KIO ginjaw de tang madun da sai lam hte Hpai Da dabang ni hpe mung shim lam jat la ya nga ai lam chye lu ai.
Matut n’na mung, N’ba Pa gaw gap ginra hta hpaw hpang wa nga ai Hpai Da dabang madu hpe mung Lahta Tsang Mung Shawa Kongsi ni gumhpraw hpyi laika shabra nga ai lam chye lu ai.
Lahta Tsang Mung Shawa Kongsi ni gaw Shweli mare e nga n’na hpun hpaga galaw sut du ni kaw na mung gumhpraw hpyi ai lam galaw nga ding yang rai nga ai. “Anhte hpung ni dai ning arang pyi n lu tim, shanhte grai nga hpyi wa ai majaw Sen 2 hte hpyi nem tawngban da ga ai” nga n’na Nawng Tau hta hpun hpaga galaw ai KIO magam gun usa langai tsun dan wa ai.
Lahta Tsang Mung Shawa Kongsi Ningbaw malai Du Kaba Lasang Awng Wa hte sut magam lit hkam Salang Ara La yan gaw ya yang Shweli mare hta Miwa gumhpraw sen 6 jan jaw ai n’ta langai mari let shamu shamawt nga ai lam na chye lu ai.
