Hpai Da Dabang ni hpe Shamyit na Miwa Shajin
January 18, 2005

The Kachin Post

Miwa atsuya a mung shawa shimlam magam dap kawn woi awn let, grupyin mungdan hkan Hpai Da Dabang ni hpaw da ai Miwa sut du ni hte Hpai da masha ni hpe du na ra ai shata 5 laman aja awa shamyit sa wa na lam, Xinhua shiga hku chye lu ai.

N’dai masing hta Myen, Laos hte Vietnam mungdan jarit hkan Hpai Da Dabang hpaw da ai Miwa sut du ni hpe ahkyak la n’na, shan hte a Miwa mung kata na sut jahpan ni hpe jep sagawn shazim kau na matu lajang nga sai rai nga ai. Miwa atsuya magam gun ni, Miwa communist party malawm ni hpe Hpai Da ai lam hta n shang lawm na matu matsun da ai rai n’na, shang lawm wa ai ni hpe mung aja awa mara jaw na lam daw dan da ma ai.

January shata praw hta Myen hte Laos mung dan jarit mayan hkan hpaw da ai Hpai Da Dabang 68 hpe pat shingdang kau sai lam Yunnan atsuya hku n’na n’dau shabra wa sai.

Hpai Da ai lam gaw Miwa mung hta tara n shang ai re majaw, Miwa sut du ni hte tinggyen akyu myit ai Miwa atsuya magam gun ni jawm n’na grupyin mungdan hkan Hpai Da Dabang ni hpaw let Hpai Da ai lam ni hpe wang lu wanglang galaw nga ai rai nga ai.

Miwa atsuya gaw grupyin mungdan jarit hkan hpaw da ai Hpai Da Dabang hkan Hpai sa ginsup ai Miwa mungdan masha ni a majaw maigan de Miwa gumhpraw wan kaba lam sum shalai kau hpe tsang nga ai rai nga ai.