Ara La hte Sam Rawtmalan Manghkang Byin
January 15, 2005

The Kachin Post

Wunpawng Mungdan Shanglawt Hpung, KIO, ginjaw hta 2004 January manghkang byin nga ai laman rim da ai kawn hprawng pru mat ai Salang Ara La a masha ni gaw Sam rawtmalan hpung langai hte manghkang byin ai lam, Ruili mare masha ni hku n’na chye lu ai.

Salang Ara La a masha ni gaw January 12 shana hta Je Gau mare Myen mung hkran na Shan State National Army, SSNA, ni hpaw da ai ‘Ye Len Tau’ ngu ai hpai da dabang kaw SSNA Du Aik Ye hte manghkang byin ai rai nga ai. Manghkang a majaw Ara La masha ni a mawdaw 2 la n mai hkra adup shanyawp kau hkurm n’na, Ma Awng ngu ai wa mung adup hkrum ai majaw Miwa tsi rung e bang da ai lam chye lu ai.

Ara La gaw ya ten hta Pang Wa mare kaw madung tawng shamu shamawt nga ai Lahta Tsang Mung Shawa Kongsi (KIO) a sut masa lit hkam langai rai n’na, Ruili mare hta shanu let hpaga galaw nga ai rai nga ai. Laiwa sai ten hta Ara La gaw KIO a sut gumhpraw ni hpe shi a tinggyeng akyu matu jai lang kau ai majaw KIO ginjaw hta rim rawng jep sagawn hkrum sai rai nga ai.

Ara La KIO hpe bai jaw ra ai Miwa gumhpraw Sen 73 jan (US $ 881,000) hpe 2004 ning hta Sut Du N’sang Tu Awng hte Yup Zau Hkawng ni hku n’na lit la ya na matu lajang wa sai rai nga ai. Raitim ya ten du hkra n lu wa shi ai lam, KIO shiga lawk hku chye lu ai. Ara La gaw KIO a sutgan hpe jai lang let Myen hte Miwa mung na mare kaba hkan n’ta hte Hotel ni mari da ai rai nga ai.

SSNA hte Ara La byin ai manghkang hte seng n’na, Miwa Balik ni gaw Ara La hpe KIO masha n re ai rai yang ladat amyu mi hku n’na je yang na re ngu tsun ai lam chye lu ai. Ara La gaw Miwa mung nga Jinghpaw Wunpawng amyu sha langai rai nga ai.

Ara La gaw KIO kawn htingbren pru mat ai Du Kaba Lasang Awng Wa hpung hpe Ja-Gumhpraw garum jaw nga ai lam, KIO shiga lawk hku chye lu ai.

N’dai manghkang a majaw Ara La hte Du Kaba Lasang Awng Wa hpung ni Miwa Jarit mayan shamu shamawt yak wa na re lam, Wunpawng Mungdan Shanglawt Hpyen Dap na mying n tsun ai Du langai tusn tsun wa ai.