NC February hta bai Hpang na
January 13, 2004

The Kachin Post

Myen Hpyen atsuya woi awn galaw nga ai National Convention, NC, hpe 2005 ning February 17 ya hta bai hpang na lam, The New Light of Myanmar shi laika hku chye lu ai.

Shata 7 jan hkring sa da ai NC hpe February hta bai hpang na lam Myen Hpyen du Lt-Gen Thein Sein hku n’na tsun n’dau wa ai rai nga ai. Lai wa sai lang na NC hpe 2004 May 17 hta hpang n’na July 9 ya hta hpa mahtai n pru ai sha jahkring da ai rai nga ai.

Lai wa sai lang na NC hta du lung ai mung dan ting na dat kasa ni hpe February 15 hpang jahtum tawn let NC galaw ai Yangon mare makau na Nyaunghnapin shara de sa du na matu shadut da ai lam chye lu ai.

2004 May hta galaw ai NC hta dat kasa 1,000 jan du lung ai rai n’na, dai hta Myen Hpyen atsuya hte gap hkat jahkring, simsa lam la da ai amyusha lak nak lang hpung 17 na dat kasa ni mung shang lawm ai rai nga ai.

February hta galaw na NC hpe sa du lung na matu Wunpawng Mungdan Shanglawt Hpung, KIO, New Democratic Army-Kachin, NDA-K, hte Kachin Defense Army, KDA, ni ga sadi jaw da ai rai nga ai. Raitim ya ten du hkra dai hpung ni hpe Myen hpyen atsuya hku n’na tara shang saw shaga ai lam n nga shi ai hpe chye lu ai.