Htunghkying Sharawt Journal Shapraw Na

Ja Ja/ USA

September 30, 2004 — Maigan nga Jinghpaw Wunpawng myusha ni a htunghking sharawt na matu Jinghpaw Wunpawng Myusharawt Hpung-Florida, USA, JWM-Florida, kaw na Journal shiga laika langai hpe December shata hta dip shapraw na lam chye lu ai.

“Shi Naura” ngu shamying ai n’dai Journal hta Jinghpaw Wunpawng myusha ni yawng hte seng ai shiga ni hpe gahkyin la n’na bai garan shabra na rai nga ai. Madung gaw America mung hte mungkan shara shagu hta chyam bra nga ai anhte myusha ni matut mahkai lu na matu re lam, journal lit hkam Bawmwang Jadan Li tsun wa ai.

N’dai Journal gaw Jinghpaw hte English laika hku shapraw na rai n’na ra ang ai Ja Gumhpraw hpe JWM-Florida kawn lit la let manu jahpu n la ai sha shabra na lam chye lu ai. Journal laika hta, htung hking hte makam masham lam, tingnang a ahkaw ahkang hte buga hpe makawp maga chye ra ai lam, shingyim hpaji hte kaga hparat ni a lam, tatut mabyin mau moi hte prat dep chyeda ra ai lam ni lawm na rai nga ai.

JWM-Florida gaw America Florida mung daw de du sa wa ai anhte myusha ni hpe hkap garum shara madun ai lam ni hpe galaw nga ai lam chye lu ai.

America mungdan, Florida State, Jacksonville mare hta Jinghpaw Wunpawng myusha ni marai 100 daram nga pra nga ai rai n’na, United States ting hta gaw marai 300 daram nga ai rai nga ai.