Dakkasu Hpaji Shakat Alu Tam Lamang Hkyen Lajang

Malihkrang Uma

September 27, 2004 — Jinghpaw Wunpawng Hkalup Hpung, KBC, ramma dap kawn woi awn let Dakkasu Jawngma Hpaji Shakat Alu tam lamang hpe du na ra ai December shata hta Christmas galung hpawng hte rau galaw na matu hkyen lajang nga sai.

N’dai poi lamang hpe Myitkyina mare hta December 3-4 ya laman galaw na rai n’na, ramma n law htum marai 2,000 jan shang lawm na matu yaw da ai lam chye lu ai. Ramma yawng hpe Christmas namchyim hkam sha shangun let, Madu Yesu shangai wa ai aten ladaw hpe hkap tau la n’htawm Karai Kasang a man e myit hkrum lam lu la ai amyu langai byin tai wa na matu yaw shada let galaw na lam chye lu ai.

December 4 ya jahpawt hta gaw marai 1,000 shanglawm lu ai lagat shingjawng poi (Marathon) galaw na rai n’na, Christmas shana shat sha poi (Chirstmas Dinner Party) hpe mung lak lai ai hku n’na galaw sa wa na rai nga ai. Ngut n’na, Myen mung na yungwi ninghkring ni hte buga na ninghkring ni shanglawm shapyaw na yugwi pinra hte ginsup lamang ni hpe mung san da ya ai lam chye lu ai.

Poi byin tai wa lu hkra Rev. Mading Zung Kyang gaw Tingnyang Up lit la n’na, Sr. Gumgrawng Hkan Naw gaw Amu Madu tai let, poi committee malawm 13 hte hpaji jaw salang marai 5 shanglawm galaw sa wa na lam chye lu ai.