Nawku Jawng 7 hta Simsa Lam Akyu Hpyi Hpawng
Galaw na Masat

Malihkrang Uma

September 24, 2004 — Myitkyina Hkristan Nawku Hpung ni a Council Ginjaw kawn woi awn let du na ra ai bat laman Nawku Jawng 7 hta Simsa lam hte Htingram lam (Peace and Reconciliation) a matu laksan kyu hpyi hpawng ni hpe shani shagu bat mi tup matut manoi galaw sa wa na rai nga ai.

N’dai Nawku hpawng ni hpe September 28 kawn October 4 ya laman galaw na rai n’na, Hkristan makam masham hpung shagu na hpung masha ni hku n’na n ginhka ai hku sha shang lawm na matu lajin da nga ai.

N’dai Nawku bat hpe Myen Mung Hkristan Hpung Kongsi Ginjaw (Myanmar Council of Churches) hte Myen Mung Katawlik Saradaw Kaba Ni Wuhpung Ginjaw kawn ginrun galaw woi na rai nga ai, Simsa lam hte Htingram lam a matu laksan kyu hpyi lamang Bat hte maren galaw ai rai nga ai.

“Nanhte shada tsawra nga mu” ngu ai gabaw hte galaw na Nawku hpawng hpe St. Columban Catholic Nawku Jawng hta shawng galaw hpang na rai n’na, Anglican Cathedral (Thida), Du Kahtawng Hkalup Hpung Nawku jawng, St. Petrick (Shatapru), First Lisu Baptist Church (Manhkring), Zi-un Hkalup Hpung (Zi-un) hte Geis Nawku Htingnu hta hpungding dat galaw sa wa na rai nga ai.

N’dai lam hte seng n’na, seng ang ai Nawku Hpung masha ji nban yawng shang lawm lu na matu Nawku Hpung shagu hta shiga shana, myit sharawt ya na lam Myitkyina Hkristan Hpung Kongsi Ginjaw Amu Madu Bishop Abraham Zau Hkawng (Anglican Church, Myitkyina) kaw n’na shadut da ai lam chpye lu ai.

N’dai kyu hpyi hpawng lamang ni hpe shana de hking 6:00 hta hpang wa na rai nga ai.