Ramma 500 Jan Hkrum Zup

Malihkrang Uma

September 22, 2004 — Ramma marai 500 jan shang lawm ai ramma ganawn mazum hpawng hpe Jinghpaw mung Myitkyina mare kaw September 19 ya Dap Kawng Jinghpaw Wunpawng Hkalup Hpung Nawku Jawng hta galaw lu sai rai nga ai.

N’dai hpawng hta Shatapru Hkalup ramma, Mung Na (Wai Maw) Hkalup ramma, Maisak Wang Hkalup ramma, Sanpra Hkalup ramma, Shanglawt Hkristan ramma ni hte Dap Kawng (Madu) Buga Hkalup ramma ni du lung ai rai n’na, Dap Kawng Buga Hpung ramma lit hkam Sr. N’naw La Ja woi awn shabyin shatai ya ai rai nga ai.

Yawng hte gaw tinang n hkau shi ai ramma ni a ka-ang de du bang mat ai majaw n chye tsun ai namchyim hpe hkam sha ai nga n’na shang lawm ai ramma langai tsun wa ai.

Buga shagu na Ga tsun-shaga ninghkring marai langai hpra pru nhtawm, Hta Hkrup Ga Tsun Shing Jawng ai lam hpe sha-a chai hpa lamang langai hku galaw woi ma ai. Dai hpang gaw Nawku Hpawng lamang de sit shang wa sai rai nga ai.

Ganawn Mazum hpawng a Mungga hpe Rev. Dr. N’gan Tang Gun (Kachin Teological College ningtau Jawng Up) htawn tsun ai rai n’na, daini na ramma ni a ningmu hpe Karai Kasang hta jahkrum la lu ai lam htawn tsun ya sai.

Buga Hpung shagu na du sa ai ramma ni mung shachyen shaga ai lam hpe alak mi aten la n’na galaw let, ramma committee malawm ni hpe shachyen ya ngut ai hpang mahkawn (choir) langai hpra hte mahkawn shakawn lai wa sai rai nga ai. Ganawn mazum kyu hpyi hpawng ngut ai hpang madu Buga ramma ni kawn malu masha hte hkap hkalum ai hpe yawng gaw pyaw pyaw law law lu sha n’na, shana de hkring 5:30 daram hta tinang a buga de bai bra wa ma ai.