Simsa Lam N’htoi hpe Chiang Mai Wunpawng Nawku Jawng hta Galaw

Naw Awng/ Chiang Mai

September 20, 2004 — Wunpawng Christian Church, WCC, Chiang Mai hta 4 lang ngu na Mungkan “Simsa Lam” ninghtoi masat hpe September 19 shani laban nawku hpawng hte rau galaw lu sai rai nga ai.

N’dai nawku hpawng hpe Kachin Women Association of Thailand, KWAT, kaw na shayi Mai Ja hte Women’s League of Burma, WLB, na Peace Builder ni woi awn let galaw ai rai nga ai.

Shinggyim masha ni a myit hta “Simsa lam” ngu ai hpe “na ga ai hte pyi, Oh..n’dai gaw, anhte a matu ra nga a hka” ngu ai hpe shawa masha ni law law chye mat wa na matu, manghkang langai hpe hpran ai ten hta mazut ai hku, gasat gala re ai hku mai byin ai daram n hpran na matu yaw shada da ai lam Mai Ja tsun dan ai.

Shayi Mai Ja sakse hkam ai hta, Myen mungdan kata kaw nga ai ten hte ya na zawn maigan mungdan hta shingbyi let Myen mungdan a matu tinang dang lu ai atsam hte shakut ra taw nga ai gaw, anhte a mungdan “Simsa Lam” n lu shi ai majaw re nga n’na, sak se hkam hkaw tsun dan sai.

Chiang Mai WCC ramma ni kawn “Bai wa rit...moi na e din” ngu ai mahkawn hpe simsa lam hpe marit maroi la ai n’sen hte matut shang lawm n’na, Hpung woi sara kawn Myen mungdan ngwi pyaw simsa na matu hte mung masha ni hta simsa lam lu la na matu kyu hpyi la sai.

Myen-Miwa ga jarit, Myen-Thai ga jarit hte Thai mung kata na Buga Hpung yawng 25 hta “Simsa Lam” masat nawku hpawng ni hpe lu galaw lu sai lam hte, Myen mung Hkalup Hpung, MCC, hku n’na mung, n’dai September 21- October 10 laman “Simsa Lam” masat nawku hpawng ni hpe galaw sa wa na matu Buga Hpung shagu de laika shabra da sai lam, Mai Ja tsun wa ai.

“Simsa Lam” gawgap sharawt ai lamang hpe 2001 ning September shata hta Mungkan Wunpawng Hpung, UN, a dawdan masat hte mungkan de woi awn shamu shamawt wa ai sai rai nga ai. Thai mung Chiang Mai mare kaw rung jung let Myen mung na amyu shayi ni a ahkaw ahkang ni matu shamu shamawt nga ai WLB gaw Peace Team hpaw let dai ning kaw na Simsa Lam masat nawku hpawng ni hpe galaw hpang wa ai rai nga ai.

WLB gaw, Myen mung na amyu baw sang Amyu Shayi Hpung 12 lawm n’na, 1999 ning December 9 ya hta gaw sharawt hpang wa ai uhpung rai nga ai. Peace Team hta gaw, dai hpung (12) hta n’ga, ganawn mazum hpung ni mung shang lawm nga ai lam tsun dan wa ai.

Shayi Mai Ja gaw, KWAT malawm langai rai n’htawm, WLB a Peace Building lamang hta magam bungli galaw gunhpai nga ai rai nga ai.