Myitkyina kaw Bawm Kapaw; 1 Si, 3 Hkala

The Kachin Post

September 17, 2004 — Jinghpaw mung Myitkyina mare Shatapru lawk hta bawm langai kapaw ai majaw masha marai mi si mat n’na, marai 3 hkala hkrum ai lam, Myitkyina mare masha ni tsun wa ai.

Bawm kapaw ai mabyin gaw September 15 ya shana hta Bawmwang Sinwa Naw a dum n’ta kaw byin ai rai n’na, n’ta madu wa kalang ta si mat wa ai lam chye lu ai. Bawmwang Sinwa Naw gaw Kachin National Organization a ningbaw Sut Du Bawmwang La Raw a kahpu rai nga ai.

N’dai mabyin hte seng n’na ya ten hta gadai mung mahtai n lu jaw shi ai raitim, Bawmwang La Raw a kahpu si mat wa ai re majaw Wunpawng Mungdan Shanglawt Hpung, KIO, kata byin nga ai manghkang hte matut manoi nga na re ngu Myitkyina mare masha ni shadu nga ma ai.

“Marai rai galaw ai n rai yang gaw, mung masa hte n seng ai,” ngu Bawmwang La Raw BBC Myen shiga dap de tsun dan wa ai. “Nye kahpu gaw mung masa galaw ai n re.”

Myitkyina mare masha ni tusn jahta nga ai hku rai yang, Bawmwang Sinwa Naw gaw shi hkum shi tsa nang n’na bawm kapaw dat ai re lam chye lu ai. Bawmwang Sinwa Naw gaw New Democratic Army-Kachin, NDA-K, magam gun langai mung rai nga ai.

Lai wa sai February 26 ya hta Laiza mare hta bawm kapaw ai majaw Wunpawng Mungdan Shanglawt Hpyen Dap, KIA, a ningtau Dap Awn Daju Du Kaba Lazing Bawk n nga mat wa ai rai nga ai. N’dai mabyin hte seng n’na mung ya ten du hkra mahtai n pru shi ai rai nga ai.

Shagrin la n lu shi ai shiga ni hku rai yang, Du Kaba Lazing Bawk hpe bawm hte kapawt sat kau ai mabyin hta Miwa ni hte Bawmwang La Raw gaw hpang kaw na shang lawm ai lam na lu ai.