KIO a Chyinghka Hpaw Da ai Lam hpe Hkap La na
N mai Byin; Lasang Awng Wa Tsun

The Kachin Post

September 16, 2004 — Jinghpaw mung Pang Wa mare hta shamu shamawt nga ai Du Kaba Lasang Awng Wa hpung ni hpe Wunpawng Mungdan Shanglawt Hpung, KIO, hku n’na bai hkrum wa lu na matu chyinhka hpaw da ya ai lam gaw mahtai n re lam, Du Kaba Lasang Awng Wa tsun wa ai.

“Chyinghka hpaw da ya ai hpe gaw n hkap la ai,” ngu Du Kaba Lasang Awng Wa The Kachin Post de Telephone hku n’na tsun wa ai. Hpa majaw nga yawng n’dai gaw shawa na ra ai n’sen n re ai hte mara lu n’na n’ta kaw na pru mat wa ai wa hpe chyinghka hpaw da ai laman bai n shang wa yang n hkap la sai lam hte bung ai lam, Lasang Awng Wa matut tsun wa.

Du Kaba Lasang Wa hte hpung ni hpe KIO kanu dap de bai wa n’na, amu magam jawm gun hpai na hpe KIO Ginjaw kaw n’na chyinghka hpaw da ya sai lam hpe September 8 ya hta shabra ai Wunpawng Amyusha Mungbawng Rapdaw, WMR, myit hkrum daw dan ai lam n’dau laika hta ka da nga ai.

Dai hku KIO chyinghka hpaw da ya ai majaw manghkang ni hpe ta tut hpran sa wa na matu WMR, KIO hte New Democratic Army-Kachin, NDA-K, hpung malawm ni hte Htinglu Htinglai hpung langai hpe hpaw da sai rai nga ai. Dai hpung a hpa-awn hpe Howa Duwa Zau Gam hpe ninghtan lit shatsam sai rai n’na, KIO kaw na Du Kaba Naw Rip hte Du Kaba Naw Sam ni gaw malawm hku n’na shanglawm ai rai nga ai.

Htinglu Htinglai hpung gaw n’dai bat praw hta Myitkyina mare na WMR rung hta zuphpawng galaw n’na, de hpang Pang Wa mare de lung wa let Du Kaba Lasang Awng Wa a hpung hte bawng ban jahkrup na lam chye lu ai.

WMR woi awn let August 29 kaw na September 8 ya du hkra Jinghpaw mung Maija Yang mare kaw Wunpawng Amyusha Kahkyin Gumdin Lam Rawtjat na matu Bawngban Hpawng hpe galaw lai wa sai rai nga ai. Dai zuphpawng hta, KIO kata byin mat wa sai manghkang ni hpe madang langai du hkra bawng ban lu sai nga n’na n’dau shabra wa sai rai nga ai.

Raitim, KIO manghkang hte seng n’na Du Kaba Lasang Awng Wa tsun ai gaw, “shahte [KIO Ginjaw] gaw ganawng dat ai ni re. Anhte gaw agrawp mat wa ai ni re.”

Lasang Awng Wa matut tsun ai hta, ya ten hta lahkawng maga na KIA hpyen dap kata hta hpyen du hpyen la n’kau mi gaw bai hkrum hkat wa na hpe n ra sharawng ai ni nga ai. “Mara gaw dat ai, n malap kau lu ai baw byin nga ai,” ngu Lasang Awng Wa tsun wa ai.

Lasang Awng Wa hku na gaw Pang Wa kaw galaw na zuphpawng hta Htinglu Htinglai hpung ni a tang madun ai lam ni hpe yu n’na she jahkrup bawng ban sa wa na lam chye lu ai. Shi hku na gaw KIA Dap Ba 1 ginra hkan shara la let shada rau jawm bungli galaw sa wa na hpe maram yu nga ai rai nga ai.

Dai hte maren, KIO Ginjaw hku n’na mung Lasang Awng Wa ni gara hku tang shawn wa ai hta lakap n’na she daw dan na re lam chye lu ai.

Lasang Awng Wa a hpung malawm langai rai nga ai Sara Doi La gaw KIO a chyinghka hpaw day a ai nga hpe hkap la na matu n mai byin ai lam hte dai hpe hkap la yang arwang aya ra n’na bai shang wa ai zawn re ai majaw shaning 40 jan rawtmalan galaw wa ai hpe nyet kau ai hte bung ai lam tsun wa ai. Ngut n’na n’dai lam hpe hkap la yang tara hkam de galai mat na re majaw n mai byin ai lam, matut tsun wa ai.

“Masha ra yang masha gram, policy ra yang policy gram kau ra ai,” ngu Sara Doi La tusn wa ai. “N’dai hpe n gram kau yang hpang de mung [Ginjaw zing la ai lam] byin wa na re.”