Bawmwang La Raw hpe Je Bat Hpyen No 1 na Dawm

The Kachin Post

September 13, 2004 — Wunpawng Mungdan Shanglawt Hpung, KIO, gaw maigan mung nga Sut Du Bawmwang La Raw hpe KIO a Je Bat Hpyen Kaba No 1 ngu masat da ai kaw na bai dawm kau sai lam, Wunpawng Amyusha Mungbawng Rapdaw n’dau laika hku chye lu ai.

Je Bat Hpyen No 1 ngu ai hpe shaprai kau lu ai lam gaw 2004 ning September shata praw hta KIO Ginjaw Salang n’kau hte Kachin National Organization, KNO, a ningbaw Bawmwang La Raw ni hkrum bawng ban ngut ai hpang byin pru wa ai rai nga ai.

KIO gaw Bawmwang La Raw hpe January shata praw hta KIO Ginjaw hta byin wa ai mang hkang hpe ningpawt ninghpang maw mawn hkrang shapraw galaw sa wa ai wa re majaw Hpyen Kaba langai hku masat ai rai nga ai. N’dai hku masat ai lam hpe June 23 n’htoi hte shabra ai KIO Ginjaw committee a n’dau shabra laika hta ka da nga ai.

England mung nga Bawmwang La Raw gaw January shata KIO Ginjaw hta byin ai manghkang hta shang lawm wa let, de hpang Du Kaba Lasang Awng Wa ni hte rau Miwa Gunsan mung de hprawng mat wa ai rai nga ai.

Bawmwang La Raw gaw KNO hpe 1999 ning hta Thai mungdan Chiang Mai mare hta maigan nga Jinghpaw Wunpawng Salang n’kau mi shanglawm let hpaw hpang wa ai rai nga ai.