Myusha Myit Hkrum Lam hpe Madang Langai Du Hkra
Jahkrup Lu Sai lam WMR Tsun

The Kachin Post

September 9, 2004 — Wunpawng Mungdan Shanglawt Hpung, KIO, kata byin mat wa sai manghkang ni hpe madang langai du hkra bawng ban lu sai lam, Wunpawng Amyusha Mungbawng Rapdaw, WMR, tsun wa ai.

“2004 ning, January shata hta KIO Ginjaw kaw byin lai wa sai mabyin hte seng n’na, n’dai zuphpawng hta madang langai mi kaw du hkra myit hkrum lam bawng jahkrup la lu saga ai,” ngu September 8 ninghtoi hte shabra ai WMR n’dau shabra laika hta tsun da nga ai.

WMR woi awn let August 29 kaw na September 8 ya du hkra Jinghpaw mung Maija Yang mare kaw Wunpawng Amyusha Kahkyin Gumdin Lam Rawtjat na matu Bawngban Hpawng hpe galaw lai wa sai rai nga ai.

N’dai zuphpawng hta KIO ningbaw hte Ginjaw Salang ni, New Democratic Army-Kachin, NDA-K, na ningbaw hte Ginjaw Salang ni, WMR dat kasa ni, Miwa Gumsan mung ga jarit na Salang ni hte maigan de na Salang langai, yawng marai 28 shang lawng bawngban ai lam chye lu ai.

Zuphpanwg hpe August 29 kawn hpang ai raitim, KIO Ginjaw Salang ni, WMR dat kasa ni hte NDA-K Ginjaw salang ni gaw September 4 ya hta she lu hkrum bawng ban ai rai nga ai. Zuphpang hta Du Kaba Lasang Awng Wa hte malawm ni shanglawm ai lam n nga ai rai nga ai.

KIO a Je Bat Hpyen Kaba No 1 ngu masat hkrum da ai Kachin National Organization a ningbaw Sut Du Bawmwang La Raw hte KIO Ginjaw Salang Du Kaba Dr Tu Ja hte Du Kaba Sumlut Gun Maw ni gaw September 6 ya hta hkrum shaga ma ai rai nga ai.

WMR n’dau shabra laika hta, n’dai aten gaw shada myit hkrum lam hpe gaw-de sa wa ai aten re ai majaw, shada da asak du-baw gyam hkat ai lam, n’gup aga, n’dau laika, Internet, E-mail hte kaga lam amyu myu hku n’na shada da sari raw hkat, jahpoi ahpyak ai lam ni hpe tsep kawp koi yen na matu lajin da nga ai.