Tsang 10 Awng Jawngma Shagrau Hpawng

Malihkrang Uma

September 3, 2004 — Myitkyina Ginwang Hkalup Ramma Committee kawn woiawn let, 2003-2004 jawng lung shaning hta tsang 10 awng la lu sai Jinghapw Wunpawng ramma ni hpe shagrau ai akyu hpyi hpawng hte ramma galum hpawng hpe August 28 ya hta Behtela Nawku Jawng kaw galaw la lu sai rai nga ai.

N’dai shagrau hpawng hta, laklai madang (Distinction 6) hte awng dang lu ai Shayi N’bangbum Ja Awng (Du kaba N’bangbum Sin Wa hte Jan Ja Tawng yan a kasha) sakse hkam n’na, Rev. Dr. Saga Hkyen Naw mungga htawn ya ai rai nga ai. Shagrau hpawng hpe garai n hpang shi yang, Yugwi ninghkring ni kawn shangwi shapyaw ai lamang hpe mung mu lu sai.

Jinghpaw mungdaw hta dai ning na tsang 10 san poi htai ai jawngma marai 16,000 jan kaw na san poi awng pru wa ai jawngma marai 5353 re n’na, tsa lam shadang hku rai yang 33.26 % rai nga ai.

Jinghpaw mungdaw ting hta laiklai madang (Distinction) hte awng ai jawngma marai 661 rai n’na, 6D gaw marai 9, 5D gaw marai 12, 4D gaw marai 17 hte ngam ai ni gaw 3D, 2D hte 1D ni rai nga ai.

Myitkyina Ginwang Hkalup Hpung kata na Buga hpung ni a jahpan hku rai yang, Jinghpaw mung hta Jinghpaw Wunpawng ramma marai 700 jan tsang 10 awng ai lam chye lu ai.