Hkai Sun Zuphpawng Laiza kaw Galaw

The Kachin Post

September 2, 2004 — Hkai Sun magam bungli hte seng n’na anhte Jinghpaw Wunpawng myusha ni a matu shawng ningnan lang ngu na bawng ban hpawng hpe August shata 27 hte 28 ya shani Laiza mare na Laiza Hotel gawk nu kaw galaw lai wa sai lam, zuphpawng malawm langai tsun wa ai.

Dai zuphpawng hta Myitkyina, Manmaw, Lashoi, Kut Kai, Muse, Putao, Nawng Mun, Waimaw, Manje, N’mawk, Mugawng, Mungnyang mare hkan na hkai sun bungli hpe ta tut galaw nga ai ni hte hkai sun hpaji ninghkring marai 150 shang lawm ai rai nga ai. Marai 150 kaw na 115 gaw NGO hte Wunpawng Mungdan Shanglawt Hpung, KIO, kata na hkai sun magam gun ni rai nga ai.

Hkai sun zuphpawng hta ta tut galaw sa wa na myit hkrum masing 15 jahkrat da lu sai hte 2005 ning hta grau dam lada ai zuphpawng kaba galaw na matu yawng myit hkrum da sai lam chye lu ai.

“Ya du na zuphpawng hta Wunpawng amyu sha ni yawng a matu hkai sun hte seng ai committee, shing n rai, uhpung kaba langai lu hpaw na hpe myit mada ga ai” nga n’na KIO Hkai Sun Magam Dap Amu Madu Salang Kaba Kareng Brang Seng tsun ai. “Lahkawng ya tup ga baw 6 hpe madung tawn n’na aja awa bawngban ga ai, shang lawm ai ni yawng mung grai myit rawt ma ai” ngu n’na Kareng Brang Seng matut tsun wa ai.

N’dai zuphpawng hta Jinghpaw Wunpawng myusha ni a kata hkai sun hpaji hpe dam lada ai hku shabra ya na lam, hkai rem hte seng ai gat lawk hpaw lu lam, kani a malai aten kadun hkai n-mai lam, latung shingtai makawp maga lam, hkai sun lamu ga hkam daga makawp maga tara upadi masat da lu lam, yi hkyen ai ladat a malai aten galu hkai n’mai hkai lam ni hpe bawngban ai lam chye lu ai.

Myitkyina mare na hkai sun zuphpawng malawm langai tsun ai hta, “Wunpawng amyu sha ni a matu lak lai ai kumla re, grai pyi hpang hkrat mat sai ngu sawn lu ai, ya na zawn KIO kaw n’na woi zinlum wa ai majaw kabu ga ai, hkai sun bungli ngu ai gaw mung masa hpe ala nga ai baw n re, shang lawm lu ai majaw myit dik n’ngai” nga n’na tsun ai.

KIO Hkai Sun Magam Dap hpe 2003 ning December shata hta hpaw hpang da ai rai n’na Magam Dap Lit Hkam gaw Salang Kaba Lajawng Hkawng Lum rai n’na Ningtau Lit Hkam gaw Du Jum Dau Lum rai nga ai.

Ya ten KIO Hkai Sun Magam Dap kaw n’na Laiza mare kaw Hkau-na Jawng Sara Tai Jawng, TOT, hpe hpaw nga sai rai n’na, jawngma 17 hpe shata 6 aten ladaw hte sharin ya nga ai lam chye lu ai. N’dai jawng hta hkau-na galaw ai shaloi dat namhpun lang na malai hpun lap chyayat lang na hte, latung ni hpe tsi hte shamyit na malai hpun tsi ru ni hte makawp maga ai ladat “Organic Farming” hpe mung sharin ya nga ai rai nga ai.

KIO up hkang ginra hta ta tut galaw nga ai Hkau-na Jawng 55 hte Maija Yang mare na Hkai Sun Lahta Tsang Jawng hta gaw jawngma marai 15 hpe shata 10 aten jaw n’na sharin ya nga ai rai nga ai.