NC Lung na KIO Tsun

The Kachin Post

October 25, 2004 — Wunpawng Mungdan Shanglawt Hpung, KIO, gaw Myeng Hpyen Atsuya bai galaw na National Convention, NC, de sa lung na lam, BBC Myen shiga dap de tsun wa ai.

NC lung na lam hpe KIO Ninggawn Amu Madu Du Kaba Gunhtang Gam Shawng gaw October 23 ya Myen Hpyen Dap Jinghpaw mung uphkang daju Maj-Gen Maung Maung Swe hte Myitkyina mare hta hkrum shaga ngut ai hpang tsun pru wa ai rai nga ai. Dai zuphpawng hta KIO Tingnyang Up Malai II Dr. Manam Tu Ja mung shang lawm ai rai nga ai.

“Anhte lung na re,” ngu Du Kaba Gam Shawng tsun wa ai. KIO gaw Myen Hpyen Atsuya a Mung Masa Lam Matsun 7 hpe shawng ningnan hkap tau la ai amyu sha rawtmalan hpung langai rai n’na, NC galaw na hpe mung madi shadaw wa sai rai nga ai.

2005 ning hta bai hpang na matu myit mada da ai NC hta KIO gaw dat kasa ni galai shai ai lam n nga ai sha shang lawm na lam chye lu ai. KIO a NC dat kasa ni gaw Dr. Tu Ja, Du Kaba Sumlut Gun Maw (Ningtau Ninggawn Amu Madu), Du Kaba Lahpai La (Ginjaw Tara Rung Lit Hkam), Du Jum Lahpai Zau Raw (Kut Hkai dat kasa rung lit hkam) hte Du Jum Waw Hkyung Sin Wa (Ginjaw Committee rung Amu Madu) ni rai nga ai.