2005 Ning Praw hta NC bai Hpang na; Myen Hpyen Atsuya Tsun

The Kachin Post

October 24, 2004 — Myen Hpyen Atsuya gaw mungdan a gawda tara hte seng ai bawng ban jahkrup ai lam hpe 2005 ning January shata hta bai galaw hpang na matu mai byin ai lam tsun wa ai hpe Reuters shiga hku chye lu ai.

N’dai lam hpe Myen Hpyen Atsuya a Amu Madu I Lt-Gen Thein Sein mani Yangon mare hta shiga dap ni hpe tsun dan wa ai rai n’na, October 19 ya hta magam shara kawn shapraw kau hkrum ai Hkring Mang Daju usa Gen Khin Nyunt n’dau tawn da ai democracy mungdan gaw gap na matu masing jahkrat da ai Mung Masa Lam Matsun 7 hpe mung ding yang galaw sa wa na lam chye lu ai.

“Htaning na January shata praw hta bai hpang lu na ngu myit mada da ai,” ngu Lt-Gen Thein Sein gaw National Convention, NC, hte seng n’na tsun ai. NC hpe 2004 ning May shata hta hpang wa n’na July shata hta jahkring da ai rai nga ai. Dai hta Myen Atsuya hte gap hkat jahkring da ai amyusha rawtmalan hpung yawng ngu na daram shang lawm ai rai nga ai.

Thein Sein gaw NC hpe ta-tut lit la galaw nga ai wa rai n’na, n’dai lang hta mung amyusha rawtmalan hpung ni yawng bai du lung na hpe mung myit mada ai lam, tsun wa ai. Raitim, Aung San Suu Kyi woi awn ai National League for Democracy pati hte amyusha pati n’kau mi gaw NC hpe ninghkap da ai rai nga ai.

Khin Nyunt hpe shapraw kau ai hpang kalang ta shi hte Hkring Mang Daju ningnan Lt-Gen Soe Win gaw amyusha rawtmalan hpung ni hpe Myen Hpyen Atsuya a gap hkat jahkring lam la da ai amyusha rawtmalan hpung ni ningtsa galai shai lam n nga ai hpe sanglang dan wa sai rai nga ai.

Matut manoi rai n’na, Myen Hpyen Atsuya gaw Khin Nyunt shaning 20 jan woi awm wa ai Amyusha Kaichyan Dap, National Intelligence Bureau, hpe dawm kau sai lam October 22 ya hta n’dau wa sai.