Myen Hkring Mang Daju Ningnan Galai

The Kachin Post

October 20, 2004 — Myen Hpyen Atsuya gaw shi a Hkring Mang Daju ningnan hpe October 19 ya hta bai lata dat sai lam, Myen mung Radio hte TV shiga dap ni hku n’na n’dau wa sai.

Hkring Mang Daju usa Gen Khin Nyunt hpe Oct 18 ya hta magam gun shara kaw na “hkam kaja lam n kaja ai majaw” jahkring kau ai re lam chye lu ai. Shi a shara kaw Myen Hpyen Atsuya Amu Madu I Lt-Gen Soe Win hpe lit jaw sai rai nga ai.

Hkring Mang Daju ningnan Soe Win, asak 56 ning, gaw 2003 ning February shata hta Amu Madu II byin tai wa n’na, 2003 ning August shata hta Amu Madu I byin tai wa ai rai nga ai.

Ya na zawn Myen Hpyen Atsuya kata hta shara galai ai lam ni hpe Myen Hpyen Dap a ningbaw Sen-Gen Than Shwe a Aming hte galaw ai rai nga ai.

Gen Khin Nyunt gaw 2003 ning August shata hta Hkring Mang Daju tai wa ai rai n’na, Myen Hpyen Kaichyan Dap hpe 20 ning daram woi awn ningbaw tai wa sai rai nga ai. Shi gaw Hkring Mang Daju byin wa ai nau n’na ai ten kaw n’na Myen mung a mung masa manghkang ni hpe hpran na matu Mung Masa Lam Mastun hpe ninggam 7 masing jahkrat let galaw sa wa sai rai nga ai.

Myen mung masa hpe maram yu nga ai ni a tsun shaga ai hku rai yang, ya na zawn byin wa ai gaw Myen Hpyen Dap hte Kaichyan Dap lapran daru magam kashun hkat ai lam ni a majaw re lam hte, n’dai lang gaw tsaw htum ai madang hku n’na mang hkang byin wa ai re lam tsun maram nga ma ai.

Ya ten hta Myen Hpyen Kaichyan Dap magam gun ni hte shanhte hte ni nawn ai ni a hpaga lawk ni hpe du hkra jep sagawn zing la nga sai rai nga ai. Lai wa sai bat kawn Sam mung dingdung hkan na Myen Kaichyan magam gun ni hpe rim majaw n’na jep sagawn hpang wa sai rai nga ai.