Karen Rawtmalan Simsa Lam Jahkrup na Rawt

The Kachin Post

October 19, 2004 — Myen Atsuya ni hpe shaning 50 ning jan ninghkap gasat nga ai Karen National Union, KNU, a dat kasa hpung gaw Myen Hpyen Atsuya hte simsa lam jahkrup na matu mani hpawt hta Yangon mare de rawt wa sai lam, Myen shiga dap ni hku chye lu ai.

KNU a Ningtau Ninggawn Amu Madu No I Col Htoo Htoo Lay woi awn let marai 16 lawm ai dat kasa hpung gaw Thai mung Mae Sot mare na rawt wa sai rai n’na, maning na December shata kawn jahkrup hpang wa ai simsa lam hpe matut manoi bawng ban sa wa na lam chye lu ai.

N’dai lang na KNU hte Myen Hpyen Atsuya ni a hkrum shaga na lam 10 ya daram na na rai n’na, gap hkat jahkring lam tup hpring hkra lu la na matu shakut sa wa na lam chye lu ai.

Myen Hpyen Atsuya maga na gaw Myen Hpyen Kaichyan Dap na Lt-Gen Kyaw Thein hte Brig-Gen Kyaw Thein woi awn ai hpung hku n’na KNU dat kasa ni hte jahkrup na rai nga ai.

Simsa lam jahkrup sa wa ai KNU dat kasa ni hpe KNU dap ba 6 nga Karen mare masha marai 1,000 daram gaw simsa lam hpe ra sharawng nga ai hte tinang a ningbaw ni simsa lam jahkrup sa wa ai hpe mung madi shadaw ai lam n’gun madun ma hpe mung chye lu ai.

Laiwa sai January shata hta KNU Ningtau Ningbaw Gen Bo Mya Yangon mare de sa du let Myen Hpyen du Gen Khin Nyunt hte hkrum shaga ngut ai hpang Gap Hkat Jahkring ai lam hpe ninggup-ga hku ga sadi galaw lu sai rai nga ai. Raitim, Karen mung daw hta Myen Hpyen Dap hte KNU gaw naw gap hkat nga ai rai nga ai.

N’dai lang na KNU dat kasa ni hpe Myen Hpyen Kaichyan Dap na Col San Pwint gaw Yangon mare de woi lakawn mat ai rai nga ai.