Lasang Awng Wa hte Seng n’na KIO hte NDA-K Hkrum Shaga

The Kachin Post

October 12, 2004 — Wunpawng Mungdan Shanglawt Hpung, KIO, hte New Democratic Army-Kachin, NDA-K, na ningbaw ni gaw Du Kaba Lasang Awng Wa a manghkang hpe lawan ai hku shangut kau lu na matu Miwa Gumsan mung hta hkrum shaga ai lam, KIO Ningawn Amu Madu tsun wa ai.

NDA-K ningbaw Zahkung Ting Ying, KIO Tingnyang Up Malai II Dr. Tu Ja hte KIO Ninggawn Amu Madu Du Kaba Gunhtang Gam Shawng ni gaw October 10 ya shani Yunnan mung daw na Yinjiang mare hta hkrum bawng ban ai rai nga ai.

Bawngban ai lam madung gaw Pang Wa nga Lasang Awng Wa hpung ni KIO Ginjaw de bai pawng wa ai lam ni hta atsawm sha shangut kau lu na matu lahkawng maga na ningbaw shada man hkrum jahkrup ai rai nga ai.

N’dai zuphpawng hta KIO ningbaw ni gaw NDA-K ningbaw hpe KIO hkrum zup wa na lam hte seng n’na Du Kaba Lasang Awng Wa hpe tsun ya na matu shadut ai lam chye lu ai. “Pre-condition n tawn ai hku jahkrup la ga ngu tsun ai re,” ngu Du Kaba Gam Shawng The Kachin Post de tsun ai.

Zahkung Ting Ying mung Lasang Awng Wa hpe shi hku n’na tsun ya na matu ga sadi jaw sai lam, Du Kaba Gam Shawng bai tsun dan wa ai.

Du na October 27-28 ya hta KIO hte Du Kaba Lasang Awng Wa lapran na manghkang hpe hpung dim dat kau lu na matu KIO, NDA-K, Wunpawng Amyusha Mungbawng Rapdaw hte Lasang Awng Wa hpung ni Myitkyina mare hta jahkrup bawng ban na rai nga ai. “Lamyan ginsi ai daw gaw dai kaw jin mat wa na re,” ngu Du Kaba Gam Shawng tsun ai.