Chiang Mai Ramma ni Kanawn Mazum Ginsup

Naw Awng/ Chiang Mai

October 7, 2004 — Thai mung dan Chiang Mai mare na Hkristan Nawku Hpung 5 na ramma ni a kanawn mazum gawdin ginsup shing jawng poi hpe October 3 ya hta galaw hpang wa sai.

Ginsup poi hta Wunpawng Christian Church, WCC, Rawang Church, Lisu Church, Grace Church hte Sasana Sara Bobby Morse a jawng na ramman ni shang lawm n’na, Bobby Morse a jawng wang hta ginsup hpang wa ai rai nga ai.

N’dai kanawn mazum ginsup poi lamang gaw, anhte Jinghpaw Wunpawng ramma ni a kata hta shada tsaw ra magyep kap, myit hkrum kahkyin kumdin lam grau n’na lu na matu yaw shada let, anhte dangdi dangdep lu ai lamang hku n’na woi awn galaw sa wa ai re lam, WCC ramma hpung a ningbaw Ah Brang tsun dan wa ai. Dai ning gaw, shawng ningnan lang re majaw, gawdin ginsup shing jawng ai lam sha lu galaw ai, du wa na shaning ni hta gaw, volleyball hte kaga ginsup ai amyu myu ni hpe galaw sa wa na lam matut tsun wa ai.

N’dai ginsup ai lamang hpe marai 15 lawm ai committee kawn woi awn sa wa ai rai n’na laban ya shana de shagu, Laban bat 5 tup ginsup mat wa na re lam, chyelu ai.

Chiang Mai mare hta, Jinghpaw Wunpawng ramma marai 450 daram nga ai rai nga ai.