Nang Hpam Lu Sha ai Ramma ni Law Wa

Malihkrang Uma/ Myitkyina

October 5, 2004 — Jinghpaw mung Myitkyina mare hta Nang Hpam tsi mawan lu sha ai ramma ni law wa nga ai majaw Nu, Wa, Myitsu ni hku n’na myit tsang ya nga ai lam chye lu ai.

Myitkyina mare lahta, deng 10 jan tsan ai Ubyit, Alam, Dum Gan kahtawng hkan Nang Hpam tsi ni hpe wang lu wang dut-lu dut-sha nga ai majaw Jinghpaw Wunpawng ramma law malawng gaw dai shara de sa n’na lu sha nga ai rai nga ai.

“Ya hte gaw Myitkyina na mahkawn shabrang ni n’dai de she shara la masai,” nga n’na Lamung Zup kahtawng na salang langai mi tsun wa ai. Shabrang ni mung Mahkawn ni woi n’na, dai Nang Hpam lu sha dut ai shara hkan e shana yup hkra rai n’na pyaw chyai hkawm ai lam dai salang wa tsun wa ai.

Dai sha n ga, Myitkyina mare kata na mare kaba ni hkan mung wanglu wanglang dut lu dut sha mai nga ai lam chye lu ai. Du Kahtawng, Dap Kawng, Shatapru, Ziun, Maisakwang, Manhkring, N’bawn Lup, N’jang Dung, Jan Mai Kawng hkan e mung Nang Hpam lu sha ni hpe loi loi sha mari la mai ai lam chye lu ai. Waimaw ginwang kata hkan e mung dai Manghkang a majaw Hpung kanu kawa ni myitru nga ai lam chye lu ai.

Nang Hpam ladu lai dut sha wa ai majaw Nawng Nang Chyum Jawng na ramma n’kau mi pyi dai shara de sa n’na Nang Hpam lu sha sa lu sha ai lam chye lu ai. Lai wa sai shata hta, Nawng Nang Chyum Jawngma lahkawng gaw Nang Hpam lu sha ai majaw jawng kaw na shapraw kau sai rai nga ai. Dai jawngma lahkawng gaw Alam mare kaw Nang Hpam sa mari lu sha nga ai ten, pyada ni sa rim ai majaw rim hkrum n’na, hpang de gumhpraw jaw n’na bai dat ai lam chye lu ai. Pyada ni mung Nang Hpam hpaga ga ai ni kaw na gumhpraw la sha da ai majaw atik anang rim jep ai lam n nga ai lam chye lu ai.

Ramma law malawng lu sha nga ai Nang Hpam lu sha hpan ni gaw, Kayau sha ai tsi (Formula), Kani Chyang/Hpraw (Heroin) ni rai nga ai. Moi hkan e gaw, dai mare hkan tsa lu n’na shana maga hkan lai wa lai sa ni hpe dingbai dingna jaw ai lam ni nga tim, ya gaw Nang Hpam Lu Sha hte zim mat masai nga n’na mani hpa jahta chyai ai ni mung nga ma ai.

Ramma ni Nang Hpam lu sha nga ai lam hte seng n’na, Myitkyina na myitsu salang ni gaw, dai ni na ten hta anhte buga shara shagu hkan garu jawng nga ai manghkang kaba gaw, ramma ni Nang Hpam lu sha hte len nga ai lam re lam hte moi ten 1970 jan ning hkan kalang mi byin lai wa ai zawn bai byin wa nga ai nga n’na, tsun nga ma ai.

Kanu Kawa n’kau mi gaw tinang a kasha ni hpe kade tsun sharin tim n lu n’na, myit htum nga ai lam, n kau mi gaw tinang kasha lawm ai pyi n chye, n dum n dam rai nga ai hte, n’kau mi chyawm gaw prat hta hkan n’na byin ai baw re ai hku hkam la let, kaga mi manghkang hku n mu ai lam chye lu ai.

“Anhte gaw, Atsuya n lu ai mungdan kaw nga taw ai zawn she nga sai law” nga n’na Myitkyina na myitsu salang langai mi tsun wa ai. Dinghku Nawku, La Hpung hpawng, Num Hpung hpawng hkan e tsun jahta nga ai lam ni gaw tinang a kashu kasha ni hpe Myitkyina kaw tawn da yang hten wa na tsang ai majaw Yangon mare de tawn da lu na lam hkrai tsun jahta nga ma ai.

Myitkyina mare masha n’kau mi gaw, anhte Jinghpaw Wunpawng myusha yawng a matu nga n’na mung masa galaw nga ai mung masa uhpung uhpawng ni hte kaga myu sharawt hpung ni gaw tinang uhpung uhpawng rawt jat lam sha galaw nga n’na, Nang Hpam lu sha a majaw myusha ting hten za wa na magam ni hpe pat shingdang na hte seng n’na gaw n chye masu myi di nga ma ai ngu shadu nga ma ai.