Bawng Masha 5,000 jan hpe Dat na N’dau

The Kachin Post

November 26, 2004—Myen mung htawng hkan rim rawng da hkrum nga ai bawng masha marai 5,000 jan hpe dat ya na matu Myen hpyen atsuya hku n’na mani n’dau dat ai lam, AP shiga dap hku chye lu ai. Raitim, Myen mung democracy ningbaw Aung San Suu Kyi hpe dat ya na kumla hpe gaw n mu lu shi ai rai nga ai.

Bawng masha dat na lam hpe Myen hpyen atsuya a Raidio hte TV shiga dap ni hku n’dau wa ai rai n’na, lai wa sai bat hta mung bawng masha 4,000 daram hpe dat ya na n’dau sai rai nga ai.

Mani na n’dau dat ai lam gaw November 29 hta Laos mung kaw galaw na ASEAN chyawm tari zuphpawng a hpaw hpang ai aten mung rai nga ai. Dai ASEAN zuphpawng de Myen atsuya hkring mang daju Lt-Gen Soe Win sa du lung na rai n’na, Myen mung a dinghku manghkang ni hpe dai zuphpang hta bawngban na hpe n ra sharawng ai lam chye lu ai.

Myen hpyen atsuya a bawng masha law law hpe dat ya lam gaw October shata hta shara kawn shapraw kau hkrum ai hkring mang daju usa Gen Khin Nyunt a kaichyan dap hku n’na n tara ai hku rim rawng da ai majaw re lam tsun n’dau wa ma ai.

Ya ten du hkra bawng masha marai 600 daram sha dat wa shi ai rai n’na, dai kaw na mung masa bawng masha marai 20 daram sha lawm ai lam chye lu ai.