NC February 2005 hta Hpang na; Myen Hpyen Du Tsun

The Kachin Post

November 24, 2004—Myen hpyen atsuya a mung masa matsun 7 a ninggam langai rai nga ai National Convention, NC, hpe 2005 ning February shata hta bai galaw sa wa na lam Myen hpyen atsuya a Radio hte TV shiga dap ni hku n’na mani n’dau wa sai.

N’dai lam hpe Myen hpyen atsuya a amu madu I Lt-Gen Thein Sein hku n’na NC bai hpang na lam hpe Radio hte TV shiga hta n’dau shabra wa ai rai nga ai. February shata hta galaw na nga tim, gara shani hta galaw na lam hkrak n’dau ai lam n nga shi ai rai nga ai.

1996 ning hta jahkring da ai NC hpe 2004 ning May shata hta bai hpang wa n’na July shata hta bai jahkring da ai rai nga ai. Dai hta Myen Atsuya hte gap hkat jahkring da ai amyusha rawtmalan hpung yawng ngu na daram shang lawm ai rai nga ai.

Mung masa maram yu ai ni hku na gaw, Myen mung a mung masa manghkang gaw November 29 ya hta Laos mung Vientiane mare kaw galaw na ASEAN zuphpawng hta bawngban na ahkyak ai lamang langai rai wa na re ngu shadu nga ma ai. N’dai zuphpawng de Myen hpyen atsuya a hkring mang daju ningnan Lt-Gen Soe Win sa du lung na rai nga ai.

Laiwa sai bat hta kaichyan dap a n tara ai hku rim rawng da hkrum ai bawng masha 4,000 daram hpe dat ya sai lam n’dau wa sai rai nga ai. Mung masa maram yu nga ai ni hku n’na gaw, n’dai lam ni hpe maigan mungdan ni a Myen hpyen atsuya a democracy gaw gap lam ni hpe mara shagun wa ai hpe shazim kau lu na matu tau hkrau n’na hkyen lajang ai re ngu mu mada nga ma ai.

2005 ning praw hta NC bai hpang na lam hpe Lt-Gen Thein Sein hku n’na October shata Myen hkring mang daju usa Khin Nyunt hpe shapraw kau ai hpang nau n’na yang tsun pru wa ai rai nga ai.