KIO Manghkang Hpungdim Dat

Malihkrang Uma

November 14, 2004 — Wunpawng Mungdan Shanglawt Hpung, KIO, kata kaw laiwa sai January shata kawn ga garan manghkang byin nga ai lam hte seng n’na htingram jahkrup ai lam hpe n’dai bat laman Myitkyina mare kaw galaw ai zuphpawng hta shangut kau lu sai lam chye lu ai.

November 13 ya hta Wunpawng Amyusha Mungbawng Rapdaw, WMR, rung kaw galaw ngut ai zuphpawng hta KIO ginjaw hte Du Kaba Lasang Awng Wa woi awn ai KIO kawn htingbren pru hpung ni a lapran kata lam dawdan mast lu sai rai n’na, Du Kaba Lasang Awng Wa hpung ni gaw KIO ginjaw langai sha hta myithkrum shang wa lu sai rai nga ai.

“Daini anhte hku n’na Masat shadaw langai hpe masat kumla hku n’na myithkrum mangrum ai masat kumla hpe shapraw lu sai. Magrau grang ai lam hte myit hkrum ai lam ngu ai (Identity) hpe prat tup n shamat wa na re.” nga n’na WMR ningbaw Sr. Kaba Sumlut Naw dai zuphpawng hta tsun wa ai.

N’dai zuphpawng a daw dan ai lam hpe KIO ningbaw Du Kaba Lamung Tu Jai, Du Kaba Zawng Hra (KIO Tingnyang Up malai I), Du Kaba N’ban La (KIA Dap awn Daju), Du Kaba Lasang Awng Wa, Du Padip Gam Awng, New Democratic Army-Kachin, NDA-K, ningbaw Du Kaba Zahkung Ting Ying, Du Kaba Layawk Zelum (NDA-K Amu Madu) hte Sr. Kaba Sumlut Naw ni shanglawm ta masat mahkret sai rai nga ai. Zuphanwg a daw dan ai lam hpe November 12 ya hta lu la sai rai n’na, November 13 ya shani she daw dan ai lam hpe ta masat ka shagrin ai rai nga ai.

N’dai madang de du wa lu na matu WMR hku n’na atsam htum hkra shakut sai lam hte, lai sai ten Mai Ja Yang hte Pang Wa hkan hpawng ai WMR a shakut shaja da ai lam ni a asi rai sai nga n’na Sr. Kaba Sumlut Naw tusn ai.

November 14 ya kawn gaw Du Kaba Lasang Awng Wa hpung ni hpe KIO ginjaw kata hta shada da shara bai jahrat let htap htuk ai hku shara lajang na matu jahkrup hpang wa na rai nga ai. N’dai lam ni hpe 2004 ning December shata n htum shi ai laman KIO ginjaw hte Lasang Awng Wa ni jawm magam gunhpai na lam chye lu ai.

Laiza mare hta mung Du Kaba Lasang Awng Wa hpung ni hpe hkap tau la ai lamang hpe mung a’lak mi galaw na rai n’na, dai poi hta lang na matu Nga 2 hpe Sut Du Shadan La Ring hku n’na jaw sai rai nga ai.

KIO kata shada myit hkrum lam lu na matu shakut shaja ai lam hta Miwa Gumsan Mung nga anhte Jinghpaw Wunpawng myusha ni mung shakut shaja lawm sai hte, myusha Sut Du ni mung shanglawm wa sai rai nga ai.