License Kata Mawdaw ni hpe Matut Rim Nga

Ningma Kap

November 10, 2004 — Jinghpaw mung Myitkyina mare kata na lawk shagu hta n’dai shata praw kawn tara n shang ai hku mari lang da ai license n lu ai mawdaw ni hpe rim hpang wa ai majaw madaw madu ni gaw tinang a mawdaw ni hpe makoi kau wa ai majaw mare kata hta mawdaw dingsa ni hte Atsuya magam dap na mawdaw ni sha wan hkut hkrai hkrai rai n’na gawt hkawm nga ai hpe mu lu ai.

Myen Hpyen Atsuya gaw mungdan ting hta tara n shang ai mawdaw ni hpe sa ap na matu n’dau shana dat ai majaw, mawdaw madu ni gaw tinang a mawdaw hpe grai makoi kyin nga n’na, n’kau mi gaw tinang a mawdaw hpe hpya kau n’na makoi ai lam ni galaw nga ma ai. Seng ang ai de n sa ap ai mawdaw madu ni hpe htawng 3 ning bang na matu mung n’dau shana da ai lam mung nga ai.

Myen Hpyen Atsuya gaw laiwa sai shata tinang a Hkring Mang Daju Gen Khin Nyunt hpe shara kawn shapraw kau ngut ai hpang Kaichyan hpung a arung arai ni yawng hpe zingla hpang wa ai rai nga ai. Ya na zawn tara n shang ai madaw ni hpe zing ai gaw dai maw daw ni hpe Kaichyang hpung ni hku n’na tara n shang ai hku mungdan ting dut shabra ai majaw rai nga ai.

Seng ang ai ni gaw mare uphkang salang ni hpe mawdaw jahpan hpyi let hkan rim nga ai rai n’na, madaw jahpan du tim mawdaw n du yang mare salang ni hpe ahkyak la na matu sadi jaw da ai hpe chye lu ai.

Mawdaw rim la hkrum ai hta makam masham hpung ni a mawdaw ni mung lawm mat ai sha n ga, Myen hpyen dap Hka La Ya 21 Dap Up a mawdaw hpe mung rim la kau ai lam chye lu ai.

Laknat lang myusha rawtmalan uhpung ni a mawdaw hpe gaw ya ten du hkra rim hkra ai lam garai n nga ai. Myen hpyen dap kaw n’na laknat lang uhpung ni a mawdaw jahpan hpe hpyi da sai rai nga ai. “Laksan lakmat ka ya n’na, aten ladaw masat ya ai kata asung jashawn lang mai na re” nga n’na Myitkyina mare masha langai tsun ai.

Dai re majaw tara n shang ai mawdaw madu n’kau gaw shanhte a mawdaw ni hpe laknat lang uhpung ni hpe ap ya kau ai lam mung nga ma ai.

Ya ten hta, Myitkyina, Waimaw, Mu Gawng, Hpakant shara shagu na rim da ai mawdaw ni hpe Myitkyina ginsup pa kaba e zing tawn da n’na, Yangon mare de gawt shayu na matu mawdaw gawt masha (Driver) tam shaga nga ma ai. Yangon du hkra gawt sa ai ni hpe Myen gumhpraw lap 20,000 jaw na lam mung n’dau da ma ai.