WMR Zuphpawng Bai Hpang

The Kachin Post

November 9, 2004 — Wunpawng Mungdan Shanglawt Hpung, KIO, kata byin nga ai manghkang ni hpe hpung dim dat lu na matu yaw shada let Wunpawng Amyusha Mungbawng Rapdaw hku n’na woi awn galaw ai zuphpang hpe Myitkyina mare hta dai ni kawn hpang wa sai lam, KIO shiga lawk hku chye lu ai.

N’dai lang na zuphpawng hta KIO ningbaw Du Kaba Lamung Tu Jai, New Democratic Army-Kachin, NDA-K, ningbaw Du Kaba Zahkung Ting Ying hte Du Kaba Lasang Awng Wa hte Du Kaba Padip Gam Awng ni mung shang lawm na lam chye lu ai. Du Kaba Lasang Awng Wa gaw dai na hta Myitkyina mare de rawt wa na rai n’na, Du Kaba Padip Gam Awng gaw dai hpawt Myitkyina de rawt wa sai lam chye lu ai.

Zuhpawng malawm ni hku n’na WMR mu gun salang ni, KIO ginjaw salang ni rai nga ai Du Kaba Gun Htang Gam Shawng hte Du Kaba Gun Maw ni du lung na rai nga ai.

KIO manghkang ran hpawng hpe October shata htum hta galaw na matu masat da sai raitim Myen mung masa n ru n ra byin wa ai a majaw NDA-K ningbaw Du Kaba Zahkung Ting Ying n rau mat ai hta hkan n’na htawt sit kau ra ai rai nga ai. Lai wa sai shata Myen Hpyen Atsuya gaw shi a Hkring Mang Daju Khin Nyunt hpe shara kawn jahkring kau n’na Kaichyan Dap ting hpe sharun kau ai hpang Du Kaba Zahkung Ting Ying hpe 2 lang shaga jahkrum sai rai nga ai.

Laiwa sai August 29 kaw na September 8 ya du hkra WMR woi awn let Jinghpaw mung Maija Yang mare kaw Wunpawng Amyusha Kahkyin Gumdin Lam Rawtjat na matu Bawngban Hpawng hta KIO kata byin mat wa sai manghkang ni hpe madang langai du hkra bawng ban lu sai rai nga ai.