Plus Three Yungwi Pinra hpe Masha Hking Lam N’gun Jaw Malihkrang Uma
November 08, 2004 — Shawa masha 5,000 daram sa yu n’gun jaw ai Myen mung hta hkik dik ngu mai ai yungwi pinra hpe Myitkyina mare hta November 5 ya shana hta galaw wa sai.
Jinghpaw Wunpawng shadang masum rai nga ai Myu Lat, Sut Gun hte Ba Ba ni a Plus Three ngu ai yungwi hpung hku n’na Shatapru Hkalup Ramma ni a N’lung N’nan Sha Poi hta shawa masha ni hpe shangwi shapyaw ya ai rai nga ai. Plus Three malawm ni gaw dai ni na Jinghpaw mungkan hta mying gumhkawng nga ai ni rai nga ai.
N’dai yungwi pinra hte seng n’na Plus Three yungwi shadang Sut Gun tsun ai gaw, “anhte n’dai yungwi lamang hpe galaw ai lam gaw gumhpraw tam ai lamang n re, anhte Wunpawng yungwi madang hpe shatsaw mayu ai san san sha re, kaga amyu sha ni galaw ai hpe anhte ni mung lu galaw ga ai ngu ai lam hpe Wunpawng ramma yawng hpe madun mayu ai,” nga n’na The Kachin Post de tsun wa ai.
Plus Three Yungwi hpung ni a yungwi pinra gaw shanhte uhpung hkrai mahkawn ai rai n’na, Yangon na Lazy Club madum sumpyi hpung ni dum shapyaw ya ai hte shingdim ka manawt hpung ni shamu shamawt ai hpe shawa masha myi she n grip hkra yu n’gun jaw ma ai.
“Myitkyina kaw sha n ga, Myen Mung hta gaw hkik dik ai yungwi pinra re,” nga n’na Studio D madu Saya Aung Do tsun wa ai. Saya Aung Do gaw Myen Mung Hkristan Yungwi Hpung a ningbaw mung rai n’na, Century Band a Keyboard player mung rai nga ai.
N’dai Plus Three ni a Yungwi Pinra hpe Digital Camera 12 hte kayet n’na, VCD shapraw na re lam chye lu ai. Grau laklai ai gaw, Yangon kaw na sumla hkrung kayet ai hpung ni lang ai, Trolley hte Crane ni lang n’na sumla hkrung (live show) gayet la ai lam hpe mu lu n’na, Projecter (Power Point) hte Yungwi Pinra a shamu shamawt ai lam hpe madun da ai gaw tsan tsan kaw na yu ai pyi mu lu nga ai.
N’dai Yungwi Pinra hte seng n’na ra ai lam shajin ai hta jai lang ai gumhpraw yawng Sen 50 jan sai lam Plus Three a director langai tsun wa ai. N’dai yungwi pinra byin tai wa hkra gaw gap ai lamang ni hpe Shatapru ramma ni lit la ai rai n’na, shatsawm jahtap sumla ka ya ai manu sha pyi Sen 2 jan ma ai rai nga ai.
Plus Three gaw “N’sin na Myi Prwi” hte “Lahkam” ngu ai mahkawn album 2 shapraw ngut sai lam chye lu ai. “N’sin na Myi Prwi” hpe Myitkyina na Madum Sumpyi hpung rai nga ai Amazing Band ni hte mahkawn da ai rai n’na, “Lahkam” album hpe gaw ya ten Myen Mung kaw mying gumhkawng nga ai Lazy Club madum sumpyi hpung hte mahkawn da ai rai ma ai.
