Nat Jaw Yungwi N’sen hte Karai Kasang hpe Shakawn

Malihkrang Uma

November 1, 2004 — Anhte Jinghpaw Wunpawng amyu sha ni a Ji-woi Ji-wa prat kaw na jai lang wa ai Nat Jaw Yungwi N’sen ni hpe Hkristan Nawku hpawng hta jai lang mai hkra gram lajang nga sai lam, Jinghpaw Wunpawng Hkalup Hpung shiga lawk hku chye lu ai.

N’dai hku gram lajang sa wa ai lam a ningpawt hku n’na October 30 ya hta Myitkyina Ginwang Hkalup Hpung Ginjaw a Hkristan Hpaji Dap kata na Music Committee kawn woi awn let Jinghpaw Wunpawng htunghking shakawn mahkawn hte senhkum ka shalat, mahkawn shingjawng poi hpe Geis Nawku htingnu hta galaw sai rai nga ai.

“Moi shawng de Nat Jaw poi hkan sha lang ai Wunpawng Yungwi Mahku N’sen ni hpe dai ni anhte Hkristan Nawku Htung kata kaw mung jai lang mai sai lam shadum jahprang ai lachyum mung rai nga ai,” ngu dai poi hta sa du lawm ai ramma langai tsun wa ai.

Poi a yaw shada ai lam gaw dai ni anhte Jinghpaw Wunpawng amyu sha ni kaw masha maigan amyu ni a htunghking mahkawn hpe sumrai daw la n’na mahkawn ai hku n re ai sha, anhte htunhking yungwi n’sen ni hte tinang nan ka shalat ai shakawn mahkawn ni hte Karai Kasang hpe jawm shakawn lu na matu rai nga ai.

N’dai poi hta, Senhkum (Choir) ka shalat, mahkawn shingjawng ai hta Buga Hpung 9 hte Wunpawng Htunghking n’sen hte Karai Shakawn mahkawn ka shalat, mahkawn shingjawng ai hta Buga Hpung 7 shang lawm ai rai nga ai.

Anhte amyu sha ni a htunghking ajet rai nga ai Nat Jaw prat na htung hking ni gaw anhte buga de Hkristan sasana shang wa n’na amyu sha yawng ngu na daram Hkristan makam masham de galai mat wa ai kawn gau ngwi ngwi hte hpoi wa nga ai rai nga ai.