January Manghkang a Ningbaw ni hpe Ginjaw kaw Dat

The Kachin Post

May 27, 2004—Wunpawng Mungdan Shanglawt Hpung KIO Ginjaw hta January shata kaw byin wa ai manghkang a majaw rim rawng da ai ningbaw ni hpe mara dat ya sai raitim shanhte a shim lam a majaw Ginjaw kaw sha naw nga shangun da ai lam, KIO shiga lawk hku chey lu ai.

Du Kaba Hpauyam Tsam Yan, Du Kaba Padip Gam Awng hte Sara Doi La ni hpe May 13 ya na Wunpawng Mungdan Shanglawt Kongsi Aming hte maren mara raw dat kau ya sai rai n’na, ya ten hta shanhte masum gaw KIO Ginjaw kaw naw rai nga ai.

“Dat sai,” ngu KIO Ninggawn Amu Madu Du Kaba Gunhtang Gam Shawng tsun wa ai. Raitim Du Kaba Tsam Yan gaw KIO Ningbaw malai Usa langai re ai majaw Myen nga ai de dat bang dat yang gaw loi yak na lam nga ai, ngu Du Kaba Gam Shawng matu tsun dan wa ai. Du Kaba Tsam Yan hpe gaw shi a shim lam a majaw Dap Ba 2 de ladaw langai mi sa tawn da na lam chye lu ai.

Sara Doi La hte seng n’na mung Du Kaba Gam Shawng tsun ai hku rai yang, hpung up langai re majaw KIO hku n’na n mai je yang ai lam, shi a lam hte seng n’na gaw Jinghpaw Wunpawng Hkalup Hpung KBC hpe ap sai lam chye lu ai. KIO hku na gaw Sara Doi La hpe Laiza mare na Nawng E Hku Buga Hpung hta bai magam n gun na matu matsun da ai lam chye lu ai.

Du Kaba Hpauyam Tsam Yan, Du Kaba Padip Gam Awng hte Sara Doi La ni hpe gaw January shata hta KIO a ahkang aya hpe zing la na matu maw mawn ai bungli hta ningbaw ni re ngu masat ai majaw rim da ai ni rai nga ai.