NLD hte Myusha Pati ni National Convention hpe Ninghkap

The Kachin Post

May 15, 2004 — National League for Democracy NLD pati hte Myusha mungmasa pati ni gaw May 17 ya hta galaw hpang wa na National Convention de n shang lawm sai lam mani daw dan ma ai.

N’dai daw dan ai lam hpe NLD pati ningbaw ni hku n’na mana de n’dau dat ai rai nga ai. De hpang nau n’na yang myusha pati hpawng chyawm rai nga ai United Nationalities Alliance UNA gaw myint mang hkrum rai National Convention hpe n lung na daw dan wa ai rai nga ai. UNA gaw 2001 ning hta gaw de da ai rai n’na, Myusha pati 8 shanglawng ai rai nga ai.

“National Convention de shang lawm n’na Mungdan a matu akyu nga wa na lam hpe NLD hku n’na n kam ai majaw n sa lung ai re,” ngu NLD Tingnyang Up Aung Shwe AP shiga dap de tsun wa ai.

NLD gaw shi a ning baw lahkawng rai nga ai Ninggaw Amu Madu Aung San Suu Kyi hte Ningtau Tingnyang Up Tin Oo ni hpe n’ta kaw rim da ai kawn n dat ya ai majaw mung National Convention hpe ninghkap ai lam chye lu ai. NLD ningbaw ni hte malawm ni hpe Hpyen atsuya ni rim da ai gaw du na ra ai May 30 ya hta gaw laning mi hpring sai nga ai.

“Anhte tangshawn da ai lam ni n lu na re chye ai majaw, Anhte hku n’na NC n sa lung ai re,” ngu UNA ginjaw salang hte Shan Nationalities League for Democracy SNLD Tingnyang Up Hkun Tun Oo tsun wa ai. SNLD gaw 1990 ning ralata poi hta rapdaw shara 23 dang da ai pati langai rai nga ai.

NLD, UNA hte gap hkat jahkring da ai hpung 6 gaw Myen Hpyen du ni a National Convention matu masat da ai tara n’kau mi gaw democracy lai ladat hte ninghtan shai ai re majaw bai garam dawm kau na matu tang shawn da ai rai nga ai.

Raitim, Myen Hpyen Atsuya hku n’na gaw National Convention hpe sa du nga ai dat kasa ni hte awng dang hkra galaw sa wa na re lam tsun wa ma ai. NC Data kasa 1,100 jan gaw mani hpang jahtum tawn let mying jahpan bai sai rai nga ai.